Wednesday, February 03, 2016

REDUZ ORSAMENTU ESTADO LIUHUSI ATIVIDADE OPERACIONAL


Reduz orsamentu estado laos deit tenki hamenus orsamentu estado ba tinan fiscal nian. Maibe reduz orsamentu estado mos liuhusi hamenus atividade operacional neébe maka bele fo vantazen diak hodi assegura orsamentu estado. Alende hamenus atividade operacional maneira seluk mos oinsa uza facilidade ka ekipamentu neébe maka iha edifisiu estado. Iha media massa Governo mos deklara katak perzisa iha mentalidade no erói foun hodi liberta nasaun husi kiak no mukit. Liliu oinsa uza orsamentu estado hodi halo desenvolvimento nasional ba prosperidade povu iha nasaun ida nee. Desenvolvimentu husi kondisaun nasionál nian hodi hadia kondisaun nasionál seluk[1] neébe maka ita hotu hakarak ba moris diak nian. Tanba neé uza orsamentu estado tuir planu linha Ministerial nian no labele halakon osan ou korupsaun ba orsamentu estado. Iha tempu agora atu sai erói ba nasaun la persiza kaer kilat maibe la-halo korupsaun mos bele asegura sustentabilidade vida nasaun ba futuru dehan Governador Jakarta Basuki T. Purnama (Ahok)[2]. Tanba Korupsaun viola ona eróis sira nia sakrifísiu neébe uluk fo an mati hodi liberta nasaun iha tempu pasadu.

Notas tuir mai nee pontus balun neébe maka persiza iha politika no mentalidade diak hodi pratika iha edifisiu estado hotu iha terenu, liliu oinsa mak iha pratika diak hodi reduz orsamentu estado liuhusi atividade operacional iha Instituisaun Governo hotu.

1.       Reduz Tinta no Surataán

Reduz tinta toner no surataan neébe maka uza lorloron iha edifísiu estado nian. Atu reduz osan estadu hodi sosa tinta ka toner dalan ida maka dokumentu hotu-hotu neébe maka atu imprimi ka cetak tenki uza font ka letra neébe maka mihis no kaman hodi imprimi dokumentu. Exemplu: Karik dokumentu oficial sira neébe mak toman uza letra ka font Times New Roman tenki muda fali ba font ka letra Garamond. Tuir estudu ida husi Estado Unidos Americana alunu ida ho naran Suvir Mirchandani[3] halo pesquisa ida konaba oinsa reduz orsamentu estadu liuhusi maneira uza toner ou tinta iha edifísiu estadu nian. Suvir fo hanoin ba Estado Americana katak dokumentu hotu-hotu neébe maka produz iha edifisiu estado hotu iha Americana tenki uza letra Garamond. Tanba font Garamond ho karakter neébe kaman, mihis no uza deit 25% tinta ka toner hodi imprimi dokumentu.

Suvir mós halo analiza ida ba 5 pagina sampel husi dokumentu portal legal Goverment Printing Office (GPO) husi Estado Federal Americana, no  nia detekta katak orsamentu estado ba imprimi tinan ida nian ho total $1,8 bilhão (miliar) bele redus toò $400 milhão (juta). Resultadu pesquisa publika iha The Jornal for Emerging Investigators (JEI) neébe mak harií husi estudante Pós-graduado Harvard iha tinan 2011.

Baseia ba pesquisa husi Suvir neè persiza iha politika ruma hodi rekomenda ba instituisaun estado hotu-hotu atu imprimi dokumentu legal tenki uza font ka letra Garamond, hodi nune bele reduz orsamentu estado hodi sosa toner ka tinta.


2.      Desktop ba laptop hodi reduz energia.

Komputador desktop neébe mak uza iha edifísiu estado gastu energia boot liu kompara ho laptop. Mesmu folin laptop karun liu maibe laptop bele reduz energia no mos bele ajuda ema hodi halo servisu lalais hanesan iha edifísiu, uma no fatin seluk hanesan viajen estranjeiro no viajen lokal sira. Alende nee laptop sei la perzisa UPS hodi garantia energia wainhira ahi mate.

Desvantezen husi desktop nia mak:
a.       Gasta energia boot husi CPU no monitor.
b.      Komponen barak hanesan Monitor, CPU, Keyboard no mouse.
c.       Ukupa fatin
d.      Tenki uza UPS hodi salva dokumentu wainhira ahi mate.
e.       Uza kabo (fiu) barak liu.

Ba serviços atendimento base de dados no servidor ba instalasaun IT nia iha edificos ministerial no instituisaun governo ka estado tenki uza nafatin Komputador desktop. 
Desvantazen laptop mak nunka metin iha fatin. Wainhira ema (utilizador sira) hakarak muda no lori ba viajen ka lori ba uma nee bele implika hodi at lalais ba laptop. Maibe kuando ema kuidadu laptop bele uza too tinan lima ba leten ou liu.


3.      Edifísiu escritóriu estado tenki próprio.

Labele uza kobe house iha edifísiu estado hodi halao serviços ba administração publico. Exemplu escritório governo barak mak uza hela kobe house inklui mos Parlamento Nasional.


4.      Transporte Publiku

Kria transporte publiku adekuado no seguru hodi fasilita kumunidade, estudante inklui funcionário publiku hodi halao atividade lorlorn. Funsionamento transporte publiko bele reduz orsamentu estado hodi sosa karate operacional no mos reduz mina neébe uza ba kada kareta ka motor iha edifísiu estado hotu. Kuandu laiba transporte publiku neébe adekuadu governo tinan-tinan sei amenta kareta operecional ba instituisaun estado no aumenta mos osan ba manutensaun no mina.


5.      Harií Ekipamentu Agua Potável

Estado gasta osan kada tinan $36 milão hodi sosa beé husi Indonezia[4] ba edifísiu estado hotu iha Timor-Leste inklui Parlamento Nacional. Mesmu Timor-Leste mos produz ona beé maibe latoó tuir Presidente da Repubika haktuir iha suku Menelebos, Maubesi, Ainaro wainhira halao sorumutu ho populasaun iha suku neba. Osan neébe gasta ba sosa beé husi Indonesia kompara ho orsamentu geral estado 2016 nia neébe aloka ba Dirasaun Agua Saneamento ho total $2,2 milão[5] inklui orsamentu husi Fundus Infraestruturas $10.3 milao[6]. Orsamentu ba Dirasaun Serviço Agua Saneamento ba tinan 2016 mais ho menus $12,5 milãos hodi halao insfraestruturas básica ba beé-moós nian iha Dili no mos ba Munisipiu seluk iha terenu.   

Karik Governo iha planu hodi harií sistema kanalizasaun beé moós (agua potável) ba edifício estado hotu inklui ospital escola publiko hodi nuneé bele halakon orsamentu estado hodi sosa bee aqua ba edifícios estado hotu. Presu internasional ba ekipamentu kanalizasaun bee-moos nian tuir portal alibaba.com iha varias oioin hahu husi $5.mil toó $1.milao.[7] Sekarik governo iha hanoin atu harií ekipamentu beé-moós ba kada edifísiu estado hotu bele reduz ona orsamentu estado hodi sosa beé husi Indonesia.


6.      Projetor hodi troka surataán ba imprimi.

Esperiencia barak wainhira halao seminário ka workshop ruma matéria ka dokumento produz barak maibe la rai ho diak no ikus mai dokumentu sira nee ba hotu lixo. Tan nee dokumentu sira neébe mak atu distribui iha seminário ka workshop diak liu apresenta liuhusi projetor. Partisipante sira neébe mak hakarak dokumento haruka direita deit ba email hodi lee iha komputador no la persiza imprimi. Tan nee uza internet ka email atu hetan dokumentu sira nee hanesan dalan ida hodi reduz orsamentu hodi sosa surataán.


7.      Hamosu energia alternativu hodi troka EDTL.

Orsamentu estado ba tinan 2015 neébe aloka ba Ministério Obras Publika Transporte no Telekomunikasaun (MOPTK) neébe hodi halo infraestruturas básica iha Timor-Leste foin ezekuta 59%, tuir Gastão de Sousa, Ministro Obras Publikas ba jornalistas sira foun dadauk nee. Ministru mos hatutan katak numeru ezekusaun ida nee mos barak liu uza ba mina hodi ense gerados iha Hera no Betano[8]. Governo halo investimento boot ba área energia (EDTL) Hera no Betano maibe benefisiu husi inventestimentu nee hira mak tama fali ba estado? Timor-Leste nasaun ida neébe direitamente hetan loron matan oras 8 nia laran iha loron ida. Loron matan (energia matahari ka energia surya) nee bele produz energia alternativu hodi troka energia neébe depende ba petrolífero ka minarai. Iha nasaun barak komesa implementa ona energia loron matan nee hanesan energia alternativu hodi konsume lorloron. Ezemplu iha Alemanha iha Bairo ida uza deit energia loron matan neébe mak instala iha bairo laran ho naran kuinesidu Schlierberg[9]. Resultado pesquisa hatudu katak energia loron matan oras ida nian bele kompara ho energia neébe maka uza iha mundo tomak ba tinan ida nian[10]. Iha Espanha Governo iha planu atu instala energia loron-matan ba auto-konsume iha nasaun laran. Tan nee governo privatiza tia energia loron-matan hanesan aset Estado no ema ruma mak instala energia loron-matan hodi konsume domestika seim autoriza husi governo sei multa ate 30 milhões de euros (mais-menus $100 milhões USD)[11]. Vantazen uza energia surya neé tanba laiha polusaun hodi estraga ambiente no mos uza energia saugate (grátis) tinan ba tinan nunka hotu.

Timor-Leste nia orsamentu estado tinan-tinan depende ba folin minarai iha mundu. Iha prediksaun oin-oin konaba mina maran iha tinan 5 ka tinan 10 tuir mai. Maibe laiha estudu ida neébe klaru katak produsaun mina Timor-Leste nian too wainhira? Ida nee sai perguntas ba ita hotu. Governo mos toó agora sidauk kria maneria saída mak bele fo vantazen ekonomia ba Timor iha futuru wainhira produsaun mina laiha ona iha futuru?

Energia alternativo seluk mos mai husi biogás, bio diesel biomassa no selu-seluk tan.


8.      Persiza verifika kriteria ba Veterano sira.

Lideransa balun mos rekuenese katak iha failansu no mal administrasaun ba registu veterano sira. Tan nee Governo persiza halo verifika see los mak veterano los no see los mak veterano palsu. Presidente Republika mos rekuenese katak problema veterano oras nee sidauk rezolve ho diak. Exemplu veterano sira agora fahe ba grupu rua; ida mak simu osan no ida seluk sidauk simu osan husi estado. Tan nee persiza buka dalan hodi rezolve[12]. Presidente Republika mós hateten katak uluk veterano lolos neébe mak iha ailaran hamutuk 600 deit no la-toó rihun ida. Agora nomor veterano barak no registu mos sidauk hotu[13]. Iha parte seluk veterano António da Costa Ximenes hateten katak nia ho kolega veterano balun registu iha tinan 2003 maibe toó agora sidauk simu osan veterano nian. Aquilino Guterres mos hateten katak problema veterano too agora sidauk rezolve tanba komisaun homenagem neébe foti dadus iha base fo mos kontribui ba problemas veterano nia tanba sira la halo verifikasaun dadus[14]. Maiske problema veterano sidauk rezolve ho diak kada tinan Governo sempre aloka orsamentu estado ba veterano sira ho motante neébe mak boot. Iha proposta orsamentu estado 2016 nian aloka osan ho montante $104.000.000.- hodi selu veterano ba tinan 2016 nian[15]. Problema seluk husi veterano mak dala barak fo sai iha media massa katak veterano sira hadau projeitu liliu projeitu EDTL nian. Vise Presidente Parlamento Nasional deputado Adriano do Nacimento hateten katak iha Suai projeitu electricidade labele halao tanba veterano balun hadau malu projeitu hatoó iha debate orçamento estado ba tinan fiscal 2016 iha loron 17-12-2015 iha plenário Parlamento Nasional[16].

Iha parte seluk veterano sira mos rekonese katak sira han osan estado saugati deit hanesan simu osan fulan-fulan maibe sira lahatene saída maka sira tenki halo ba estado. Preokupasaun ida nee hatoó husi Veterano Mário de Deus hatoó ba Presidente Republica iha suku Ducurai, Posto Administrativu Letefoho Municipiu Ermera iha loron 27 Outobro 2015 liuba[17].  


9.      Proteza Propriedade Estado 

Governu tenki proteze rai estado neébe mak iha potensi hodi halo investimento iha futuru diak liu agora kedas fo protesaun ba rai sira nee. Hodi nunee kumunidade ka populasaun labele ukupa fali. Primeiru Ministru Rui Maria de Araujo haktuir katak registu rai importante ba desenvolvimento Timor-Leste nian iha futuru[18]. Maibe rai sira neébe maka kumunidade sira ukupa rai estado, Governo mos tenki fakar osan hodi muda populasaun husi rai estado. Ezemplu rai protezida ba ambienti verde nian iha área Palapaso Dili populasaun sira hela neéba kleur ona inkuantu Governu obriga populasaun sira sai, persiza mos osan hodi muda populasaun sira. Agora dadauk Governo mos iha planu atu rehabilita Aeroporto Presidente Nicolau Lobato maibe sei buka meus oinsa mak bele rezolve no kria kondisaun ba populasaun neébe besik iha Aeroporto[19]. Atu muda populasaun iha área neéba Governo mos sei gasta osan lubuk ida hodi resolve problema nee. Exemplu seluk husi Indonezia, Governo Jakarta hakarak normaliza bairo balun neé mak  tinan-tinan sempre iha impatu inundasaun hodi muda populasaun maibe tenki multa (ganti rugi) neébe boot. Mesmu iha osan kompensasaun maibe komunidade barak mak proteza katak sira hela iha fatin neéba tinan barak ona. Iha prosesu negosiasaun hodi muda populasaun husi fatin ida ba fatin seluk sei la fasil no dala barak populasaun barak mak sai vitima ba planu Governu nian. 


Bazeia ba experiencia sira hanesan nee Governo persiza iha politika ida neébe diak hodi asegura propriedade estado hodi nune iha futuru governu bele reduz osan estado kompensasaun nian ba komunidade sira. Exemplu iha Covalima governu mos fo osan kompensasaun ba populasan sira nia rai neébe hetan husi projeitu tasi mane ho osan neébe boot. Exemplu seluk mos governo tenki hasai osan hodi multa ba populasaun konaba haluan estrada iha Dili no mos iha fatin seluk. Tan nee Governo tenki halo lista ida konaba propriedade estado neébe iha futuru sai tarjetu ba projeitu desenvolvimento tenki proteze agora. Hanesan tau papan avisu ba rai estado hotu hodi nune populasaun mos bele kompriende konaba estatuto propriedade estado nian. Maneira ida Governo la persiza hasai osan kompensasaun ba rai estado iha futuru.

Exemplu populasaun balun agora dadauk hela iha foho lolon hanesan; Komoro, Tasitolu, Balide, Manleuana, Metiaut, Área Branca no selu-seluk tan. Sekarik Governo la-proteze foho lolon sira nee, tinan sanulu tan foho lolon sira nee sei nakunu ho uma populasaun. Impatu husi uma iha foho lolon sei fo inundasaun ba sidade Díli iha tempu udan, exemplu hanesan iha Jakarta Indonesia no sidade selu-seluk iha Asia no mos iha mundu neebe fo sai iha media TV.


10.   Kontrola Presu Merkadu.

Sasan neébe konsume iha Timor-Leste husi importasaun liliu sasan ba necessidades básica maioria husi Indonezia. Tuir lolos Timor-Leste neébe uza moeda Amerika neébe kompara ho moeda Rupiah Indonezia boot tanba-sa mak sasan sira husi Indonezia nee presu sei as nafatin. Presu sasan sira nee mos entre loja ida ho loja seluk presu mos iha diferensia boot. Domingos Guterres diretor regulasaun Comersial haktuir katak Timor-Leste oras nee sei depende ba sasan importasaun tanba sasan iha rai laran ladun iha merkadu internasionál tanba nee numeru exportasaun tun makaás no importasaun sae ba bebeik iha rai laran[20].

Deputado Francisco Branco husi Bankada Fretilin hateten Timor-Leste oras nee dadauk sei kontinua no dependente ba sasan importasaun tanba iha governantes balun mak iha intensaun hakarak hetan pursentu husi sasan importasaun no kestaun importasaun hanesan projeitus ida ba governantes sira[21]. Se sasan importasaun hanesan projeitus ida wainhira los mak governantes sira fo antensaun ba produtu lokál iha rai laran.

Timor-Leste hanesan nasaun satelit neebe depedensia ba sasan importasaun fo vantazen ba três amigos (tiga serangkai)  mak hanesan; kapital estranjeiros (modal asing), governasaun lokal no elite lokal sira mak halimar no manobra ba sasan importasaun inklui mos presu. Rezultadu mak desenvolvimentu haputar deit iha pilar tolu nee nia liman no povu hanesan serviço nain deit[22]. Tan neé diak liu nasaun sira neébe moris iha mundu datolu nian harií mesak industri  no labele importa teknolojia no mos revizaun fali ba deve osan no negosiu ho nasaun boot sira.[23] Relasaun entre nasaun dominante no nasaun dependente hanesan relasaun neébe laiha balansu, tanba desenvolvimentu neébe halao iha nasaun dominante selu husi nasaun dependente nia osan[24]. Analiza iha leten dudu ita atu aumentu no hasaé kapasidade produsaun iha rai laran maibe depende mos ba kapasidade sosa (pengeluaran) husi ita nia povu[25].


11.    Prepara Juventude iha Area Desportu.

Iventu desportu iha nível regionál no internasionál neébe mak ita nia rekursu sidauk preparativu diak liu prevene. Oinsa atu prepara atletismu sira ba longo frazu nian hodi nune ita bele fiar an atu kompete iha nível regionál no internasionál iha futuru. Inklui mós prepara infraestruturas básika neébe bele suporta ba nível desporto hotu neébe mak ezisti iha ita nia rain. Exemplu foin dadauk ita nia atletismo husi football nia hetan derrota boot wainhira halao joga kualifikasaun ba copa mundiál nain no selu-seluk tan.  


12.   Reduz Iventu Serimonial

Reduz mos iventu serimonial sira neébe mak gasta osan estado hanesan serimonial ba loron nasionais no loron internasionais neébe maka tinan -tinan halao iha terenu.


Dili, 18 Novembro 2015
Hélio Freitas 




[1]Dr. Ida Bagus Gde Yudha Triguna, M.S. dlm Mengenal Teori Pembangunan.
[2]http://www.satuharapan.com/read-detail/read/ahok-peringati-hari-pahlawan-cukup-jangan-korupsi
[3]http://www.merdeka.com/gaya/ide-remaja-14-tahun-ini-hemat-anggaran-amerika-hingga-rp-45-t.html, http://emerginginvestigators.org/wp-content/uploads/2014/03/Mirchandani-2014-Ink-Cost-2.pdf

[4]Diário Jornal Nacional, 16 Novembro 2015
[5]Orsamentu Geral do Estado 2016 Livru 2
[6]Orsamentu Geral do Estado 2015 Livru 6
[7]http://www.alibaba.com/products/F0/pure_water_production_equipment
[8] Diário Jornal Nacional, 17 Novembro 2015.
[12]Diário Jornal Nacional, 10 Novembro 2015.
[13]Diário Jornal Nacional, 16 Novembro 2015.
[14]Diário Timor Post, 13 Novembro 2015.
[15]Orçamento geral do estado 2016 livro 4-B.
[16]Vise Presidente Parlamento Nacional, Deputado Adriano do Nacimento iha plenário Parlamento Nacional 17-12-2015.
[17]Diário Jornal Nacional, 9 Novembro 2015.
[18]Diário Jornal Nacional, 4 Novembro 2015
[19]Diário Jornal Nacional, 17 Novembro 2015.
[20]Diário Jornal Nacional, 4 Novembro 2015
[21]Diário Timor Post, 13 Novembro 2015, Diário Jornal Nacional, 13 Novembro 2015.
[23] Idem
[24] Idem
[25]Dr. Ida Bagus Gde Yudha Triguna, M.s dlm “Mengenal Teori-Teori Pembangunan hal. 37

No comments: