Friday, April 24, 2015

RENDIMENTO SALARIAL VERSUS NECESSIDADES BASICAS (SITUASAUN GERAL FUNCIONARIU FUBLICO)



Iha Programa do VI Governo Constitucional 2015-2017 ba orçamento retificativo Governu hakarak reforma administração publica neèbe maka iha programa neè hakerek kona-ba Boa Governação no Sector Publico. Governo mos nota katak durante neè administração publico lao la dun diak hodi halao makina estado iha instituição Governo. Tanba neè VI Governo Constitucional atu halo mudansa no reforma ba administração publico[1]. Ba programa ida neè fo konfiansa boot ba publico ninia espectativa ba VI Governação no mos ba administração publico iha futuro.

Tanba administração publico halao husi funcionário publico neèbe mak halao makina estado iha instituição Governo hetan obstaklu no problema oioin. Tanba neè atual Primeiro Ministro Dr. Rui Maria de Araújo hateten katak agora dadauk nomor funcionário publico hamutuk 32.000 maibe 50% funcionário mak servisu efetivo.[2]

Interversão Primeiro Ministro neè dala ruma los tanba hare rendimento funcionário publico neèbe maka hanesan servidor estado sira nia vencimento salarial la suficiente hodi uza durante fulan ida nia laran. Tanba neè funcionário barak maka abandona iha horas serviço no buka fali serviço seluk hodi amenta sira nia rendimento atu prevene necessidade iha uma laran.

Alende abandona iha horas serviço iha mos falta de controla husi liderança ka chefia ba funcionário iha horas serviço. Factos seluk neèbe maka fo impatu ba produtividade serviço mak  funcionário sira serviço la tuir área profissional tanba nomeação politica no selu-seluk tan. Maibe factores barak neèbe maka impata roda administração publico mak funcionário publico sira la dun moris dignu no saudável tanba vencimento la suficiente.

Ba asuntus iha leten liga ba standard moris mak hanesan: Necessidade primeira mak necessidade básica primeiro neèbe mak tenki dimenui atu hametin resistência moris umana neèbe dignu. Tuir Internacional Labour Organization (ILO) katak necessidade primeiro mak necessidade físico minimu umana, relaciona ho necessidade básicas adequado ba sociedade hanesan sociedade riku no kiak.

Necessidades básicas adequado sira neè tenki tuir alimentação no gizi, roupas, habitação, educação, asesu ba centro saúde no transporte, agua saneamento, segurança neèbe saudável no selseluk tan[3].

Frase iha leten neè hanesan base standard ida ba moris dignu no saudável ba sociedade sira neèbe maka moris iha uma kain ida. Standard básicas ba moris dignu neè oinsa halo komparasaun ho sociedade iha Timor-Leste. Liliú ba situação funcionário publico sira neébe maka fulan-fulan simu salarial tuir level governo nian neèbe maka prática iha nasaun ida neè. Vencimento ka salarial neè bele fo resposta ba moris dignu ka lae?

Tuir vencimento ka salarial neébe maka iha kompara ho necessidade básicas neébe maka lorloron konsume iha família ida bele fo resposta ba moris dignu ka lae? Atu hatene klean liutan iha tabela tuir mai neè alista hotu kona-ba necessidade básicas neèbe maka consume iha uma kain simples ida. Exemplo deit iha uma kain ida komponentes husi aman, inan no oan nain tolu (3) ho total hamutuk nain lima (5). Oinsa konsume ai-han lorloron kompara ho salarial neébe mak aplika tuir decreto-lei nomor 20/2011[4] (anexu).

Tabela Necessidade Básicas Lorloron
No
Necessidade basicas
Kuantidade  (fulan ida)
Folin (USD)
Total
1
Fós  inklui transporte
60kg ou menus
$17 x 2
$34
2
Mina ka bimoli
5 litru
$8
$8
3
Minarai troka ai sunu
15 litru
$8 x 3
$24
4
Modo taán putun 4 lorloron ba meudia – kalan.
Futun 4
$2 x 30
$60
5
Naán Karau
1kg
$8
$8
6
Masin midar
3kg
$3
$3
7
Café
2kg
$2.50 x 2
$5
8
Paun ba matabisu
Paun 10
$1 x 30
$30
9
Masin meer
Falun 2
$0.30 x 2
$0.60
10
Liis mean + mutin
1kg
$3 x 1
$3
11
Tinperus ka bumbu

$2
$2
12
Rinso (sabao fasi roupa)

$5
$5
13
Sabao hariis + shampoo + pepsodent

$3
$3
14
Transporte (mikrolet) ba serviço  inklui an meudia iha uma.

$3 x 24
$72
15
Transporte (mikrolet) ba oan nain 2 ba escola la inklui  sosa aihan iha escola.

$1 x 26
$26
16
Selu escola ba oan nain 2 iha escola privada la inklui hola necessidade escola nian hanesan caderno, lápis, lapijeira no selseluk tan.

$5 x 2
$10
17
Selu electridade (Pulsa EDTL) no selseluk tan.

$5
$5
T   o   t   a   l
$298.6

Tabela neé laos padrão legal ida hodi sai sasukat ba uma kain hotu-hotu maibe hanesan situação in jeral hodi hare ba gastos sira nebe mak alista iha tabela neé.

Hare husi lista necessidade básicas iha tabela neé total gastu fulan ida nian hanesan ho vencimento salarial funcionário nível 5 grau 1 nian ho total $298. Hare husi kalkulasaun neé oinsa resistência moris funcionário publico husi nível grão A toò grão G. Tabela neè indika mai ita katak karik atetude konsume necessidade básicas iha família neé tinan-tinan nafatin hanesan neè oinsa sira bele hola necessidade seluk hanesan roupa, aimoruk no mòs kontribui ba problema cultura sosial no selu-seluk tan (lee kebutuhan sandang dan pangang).  Sekarik  uma kain neè iha labarik kiik koan, oinsa atu hola ai-han no  hemu neébe iha alimentação diak ba saúde? Hanesan susuben mantolu, aifuan no selseluk tan.

Karik família ida moras ba ospital mesmo ita nia sistema saúde la selu alias grátis maibe oinsa família sira neébe maka tau mata ba moras neé husi uma ba ospital pérsica necessidade seluk hanesan transporte no sosa ai-han seluk hodi atende moras iha ospital.

Hare husi atividade funcionário, nian tenki serviço ba estado durante oras 8 lorloron kada semana. Hahu husi tuku 8 dadersan too 17.30 lokraik. Fila ba uma sei lahalo serviço hodi produs buat ruma atu aumenta necessidade balun iha uma kain ida tanba tempu no mos ambiente neébe maka nia hela laiha espasu hodi halao atividade agrícola subsistência no mos hakiak animal ka balada ruma iha ninia hela fatin.

Kondisaun real husi vencimento funcionário publico liga ba situação real no habitação sociedade iha Timor-Leste lahanesan ho rendimento neébe hetan husi nível salarial. Ita hatene katak iha Díli laran funcionário bain-bain laos diretor no mos chefia iha instituição governo, bele sosa kareta no halo uma neébe diak kompara ho rendimento fulan-fulan ita bele imagina katak osan neé mai husi neébe? Kredit ka, faan rai ka loke kios ou manan projeto husi Governo, neé hanesan hipotesa deit. 

Fila ba tabela necessidades básicas iha leten. Sekarik funcionário ida atetude konsume lahanesan iha tabela neè ita bele mos desconfia katak osan sira neè mai husi neèbe?  Situação real hatudu katak ita nia kapasidade de kompra boot liú fali ita nia rendimento salarial neébe mak simu fulan-fulan. Dala ruma ema dehan ita moris iha Díli atu hanesan ho sidade seluk iha Indonésia no sidade seluk iha Asia. Realidade hatudu katak sasan sira neébe maka faan iha loja sira iha Díli nia folin mos hanesan sidade sira neèbe mak temi iha leten.

Situação ida neé tanba iha tempu global neébe afeta ba vida moris sociedade iha Timor-Leste. Exemplo deit tuir lolós ho rendimento salarial neébe maka existe ita sei labele sosa mobile neébe maka folin liú husi $100 ba leten no mos fulan-fulan tenki ense pulsa minimal $10 ou menus husi $10 defende ba ema ida-idak nia necessidades. No mos ba funcionário sira neèbe mak iha kareta privado semana-semana sira tenki ense mina mais ho menus 40 litrus ba leten. Osan sira neè mai husi neèbe?.

Ba situação real nível salarial ba funcionário publico hanesan neè fo impatu no mos amiasa vida família no mos estado iha futuro. Intervista ho funcionário publico balun neébe mak serviço iha instituição estado durante tinan 10 ba leten sira nia regime carreira nunka saé no mos vencimento mos nunka amenta[5]. Iha decreto lei no. 20/2011[6] koalia konaba regime das carreiras no mos lista tabela de vencimento das carreiras do regime geral hahu husi categoria grão A toò grão G. Iha categoria grão  A escalão 1 toó escalão 10 simu vencimento hahu husi $510 - $663 no grão G escalão 1 toó escalão 7 simu vencimento hahu husi $115 - $140 fulan-fulan. Atu sae escalão 1 ba escalão 2 no escalão tuir mai funcionário sira tenki hetan avaliação desempenho tenki muito bom tinan rua tuituir malu mak foin sae escalão ou hetan deit bom tenki tinan tolu mak sae escalão 1. Ezemplu grão G escalão 1 base salarial mak $115 sae escalão tinan rua nian amenta deit $4 mak $119 ba escalão 2 grão G nian. Atu hetan vencimento grão G toó escalão 7 ho valor vencimento $140. Hare husi regimento funcionário nian, funcionário ida tama servisu ho grão G escalão 1 persiza tinan 12 rua mak foin toò escalão 7 no hetan vencimento $140. Hare husi tabela de vencimento neé funcionário grão G tinan ida vencimento amenta deit $2. Vencimento ida nee kompara ho folin mina fulan ida hodi ense kareta ba titulares sira sei boot liu fali vencimento funcionário grão G.

Husi grão A escalão 1 ho vencimento $510 no escalão 10 ho vencimento $663. Husi tabela regime neè tinan rua-rua mak foin amenta $17 hodi sae ba escalão ida no escalão tuituir mai. Bele dehan katak tinan ida amenta deit $8.50 ba funcionário publico categoria Técnico Superior grão A.

Baseia ba decreto-lei nomor 20/1011 neèbe mak fo sai lista tabela de vencimento das carreiras do regime geral husi categoria técnico superior grão A toò assistente grão G vencimento sira neè kompara ho tabela necessidades básicas funcionário publico sira sei labele moris ho dignu. Tanba necessidade básicas neébe konsume lorloron iha uma kain ida folin amenta ba bebeik kada tinan-tinan.

Tanba neè iha iniciativa diak husi VI Governo Constitucional hodi reforma administração publico hodi nune servidor estado tenki serviço ho mais responsável tuir profissionalismo no inovação ho capacidade hodi habadak burocracia iha administração publico ho eficaz no eficiente. Ba asaun husi VI Governo neé ita hotu apresia atu reforma administração publico hodi servi estado diak liú tan iha futuro.

Dili, 27 Marsu 2015



[1] Programa do VI Governo Constitucional, 2015-2017.
[2] Jornal Nacional Diário, 9 de Marso 2015.
[3]http://simplenews05.blogspot.com/2014/10/pengertian-dari-kebutuhan-primer.html
[4] Decreto-Lei Nomor 20/2011.
[5] Entrevista ho pessoal funcionário publico balun, Dili, 24 Marco 2015. 
[6] Decreto-Lei no.20/2011

No comments: