Thursday, December 06, 2012

NARAN LABARIK SIRA MAK LORON OHIN


My name is today. Lia-fuan nee mai husi matenek nain husi Chile, Gabriel Mistral konaba futuru labarik sira nian. Tuir Gabriel katak foó Naran ba Labarik sira mak Loron Ohin. Atu intruduz Gabriel Mistral ninia hanoin konaba futuru labarik sira iha nasaun ida nee saida maka ita tenki halo atu investe ba futuru labarik sira.
Responsavel moral konaba saida maka tenki halo ba labarik sira iha futuru maka prepara sira liu-husi edukasaun nebe maka ho kualidade. Liu-husi edukasaun maka bele salva guarda futuru ba labarik sira no mos ba nasaun. Atu alkansa objetivo nee responsabel governu nia atu investe iha setor edukasaun ho planu nebe maka diak tuir Kapasidade Orcamento Estado no mos kapasidade recursu umanu atu implementa.
Maibe realiade saida maka sai naksalan iha dalan klaran husi implementador sira konaba setor edukasaun iha nasaun ida nee. Artigu ida nee la akumula buat hotu konaba problema edukasaun maibe atu sita deit konaba programa merenda eskolar nebe maka implementa iha nasaun ida nee. 

Merenda Eskolar
Objetivo merenda eskolar nebe maka governu implementa liuhusi Ministeriu Edukasaun iha nasaun ida nee maka atu amenta alimentasaun nutrisaun  ba labarik sira. Alende amenta nutrisaun objetivo seluk mos atu foó motivasaun ba labarik sira atu badinas tuir apredizazen iha horas eskola.

Distribuisaun hahan
Hahan sira nebe maka distribui ba eskolar sira atu halao merenda eskolar maka hahan sira nebe maka iha nutrisaun ho kualidade diak. Ezemplu, susuben, foremungo, ikan (deho), masin, fos no mos koto. Hahan sira nee nakunu ho nutrisaun no bele fo motiva labarik atu tuir horas eskola nia to remata.
Implementador ba programa ida nee Governu liuhusi Ministeriu Edukasaun servisu hamutuk ho organizasaun mundial nebe maka koenesido iha mundo WFP (World Food Program) atu implementa programa ida nee iha eskola basiko sira iha terenu. Hahan nebe maka distribui ba eskola sira nee hahan sira nebe maka koko iha laboratorium tuir standar tanba hahan sira nee maioria importa mai husi nasaun seluk. Otomatikamente hahan sira nee kontrola mos iha bea-cukai (alfandega) iha porto,  nee hanesan standar nebe maka estado tenki halo atu kontrola sasan importa mai husi nasaun seluk.
Sistema atu kontrola hahan ba merenda eskolar nebe maka temi iha leten hanesan sistema ida nebe maka standar atu kontrola konaba kualidade antes distribui ba centru eskola iha nasaun laran. Maibe realidade hatudu katak sasan sira nebe maka atu halo Merenda Eskolar barak maka at no laiha kualidade no laiha distribuisaun nebe maka iha kontinuasaun. Hanesan Padre Hermenio de Fatima Goncalves hakerek iha jornal Timor Post, 21 Novembru 2011 hateten katak programa merenda eskolar  iha eskola semana ida dala rua. Maibe realidade nebe maka sasan sira nebe maka atu simu ba merenda eskolar nee barak maka laiha kualidade la tuir tempu nebe maka determina.[1]
Problema hanesan iha Sub-distrito Ainaro estudante sira fulan hitu (7) ona han etu maran deit. Tuir estudante Lucas Magno hateten katak professor sira dehan ba alunos ida-idak atu lori sira nia modo rasik husi uma atu han iha escola. Tuir diretor escola Primaria Maununo Sub-distrito Ainaro Agostinho Lopes hateten katak WFP (World Food Program) nebe maka halo distribui programa merenda eskolar nee la kompletu. Sira lori deit fos ho koto, tinan uluk sasan ba merenda eskolar nee hanesan fos ho koto inklui mos mina no deho. Agora dadauk nee fos ho koto deit ida nee no mos kualidade ladiak.[2]
Diretor Edukasaun Regional, Justino Neno husi distrito enlave Oecussi haktuir katak laiha mudansa ba menu hahan nebe maka halao iha merenda eskolar. Tanba orcamento nebe aprovado ba merenda eskolar propoin deit ba sosa fos, mina, masin no koto. Tuir profesional saude Manuel da Costa hanesan Diretor Saude Distrito Oecusse hateten katak menu ba merenda eskolar nebe maka implementa nee sei la fo´o vantagen ba kresimento fiziko no desenvolve kakatuk labarik sira nian. Diretor nee haktuir katak iha tinan 2012 presiza foó aihan seluk hanesan modo-tahan, foremungu no espesias aihan seluk nebe maka iha nutrisaun hodi apoio kapasidade alunus iha prosesu aprendizazen[3].
Laiha kontinuasaun husi programa merenda eskolar nee foó implikasaun ba labarik sira atu tuir horariu eskola ho diak. Labarik sira barak maka latuir eskola tanba deit laiha merenda eskolar iha sira nia eskola hanesan tinan uluk. Koordenador Escola Primaria (EP) Aiteas Distrito Manatutu ba Jornal Suara Timor Lorosae (STL) hateten katak labarik sira barak laiha vontade atu tama eskola tanba nee nia husu ba governu atu distribui fali hahan ba merenda eskolar hanesan tinan uluk[4].
Senorinha de Paulo aluno aon ida husi Manatutu haktuir katak kleur ona ami la han iha eskola no ida nee ami senti la hanesan uluk. Agora ami senti la kontenti, tanba ami la han iha eskola i ami nia osan mos laiha atu sosa buat ruma iha eskola hodi han, nunee ami husu ba Governu atu oferese nafatin hahan mai ami atu nune ami mos bele iha kontente hanesan mos ho ema seluk[5].
Lamentasaun Senorinha iha leten hanesan derota boot ida ba implemetador sira nebe maka halao programa merenda eskolar iha base liliu iha eskola basiko sira nebe maka sai hanesan tarjetu ba projeitu merenda eskolar nee. Lamentasoes ida nee mos atu hanoin mai ita katak labarik sira lakon sira nia direitu saida los maka Governu tenki halo ba sira. Sira mos iha hanoin ida katak komesa agora sira mos lakon sira nia esperansa atu partisipa desenvolvimento iha futuru. Sira lakon sira nia esperansa no  prepara sira nia an hodi kompete iha futuru laos tanba sira nia sala maibe sistema nebe maka implementa la akomodir ho mudansa sira nebe maka iha.
Preokupasaun Senorinha no mos alunus seluk nebe maka site iha leten ita labele komprende ho diak tanba implementador sira iha base hanesan diretor eskola sira no professores seluk sira mos iha preokupasaun hanesan ho alunus no inan aman sira. Ho ida nee semak sai responsavel geral ba problema ida nee. Ministru Edukasaun ka Diretor Nasional sira nebe maka responsavel ba programa merenda eskolar ida nee?
Atu hakotu artigu ida nee rekomenda ba  Governu hanesan implementador iha setor edukasaun liliu ba programa Merenda Eskolar nebe maka foó motivasaun ba labarik sira tenki hakaas an hodi responde saida maka naksalan iha dalan klaran hodi implementa programa ida nee. Hodi nune ita labele tarde atu responde futuru labarik sira hanesan preokupasaun nebe maka Gabriel Mistral hateten katak Naran Labarik Sira Maka Lorin Ohin. Tan nee ita labele oho labarik sira liuhusi hahan nebe maka laiha kualidade no mos laiha agenda distribusaun hahan nebe maka garante konaba merenda eskolar iha futuru. Artigu ida nee parte kiik koan ida hanoin konaba programa Merenda Eskolar no problema geral edukasaun nia hanesan infraestruturaras, rekursu umanus, kurikular no selu-seluk nebe maka sidauk temi iha artigu ida nee.

Helio Freitas
Dili, 5 Dezembru 2011



[1]Timor Post, 21 Novembru 2011.
[2] Timor Post, 28 Outobru 2011
[3]http://www.radiotvtl.com/RTTL/index.php?option=com_content&task=view&id=1791&Itemid=66
[4] STL, Kinta, 02 Junhu 2011 - 15:42:51 OTL
[5] idem

No comments: