Monday, September 17, 2012

“Hodi koalia sai ita Hakerek timor lia-sasin hirak nebe halo ona Historia iha movimento ba libertasaun nasional”


Memoria Saudozo Francisco Xavier do Amaral
No Ligasaun ho Organizasaun Moris Dame iha tempo passado[i].

Premeiro hau fo hau nia agracimento no hau ni gratidao boot ida ba komisaun organizadora, liliu ba belun Nuno Rodrigues nebe maka telepon hau iha loron rua liuba atu partisipa iha seminariu ida nee.
Segundo hau mos sinti orgulho tebes ho eventu ida nee tanba bele fahe hau nia hanoin (ingatan masa-lalu) nia no saida maka hau hatene konaba historia kiik koan ruma ba ita nia heroi boot saudozo Francisco Xavier do Amaral. 
Parte seluk hau sinti orgulho mos tanba bele tur hamutuk ho sua exelencia senhor Ministro Turismo Francisco Kalbuady, ema ida nebe hau koenesi tebes no hanesan mos hau nia maun boot ida iha tempo nebe.   Saida maka hau sei koalia iha nee sei iha mos ligasaun ituan ho maun Cico nia knaar hanesan ketua KNPI (Komite Nasional Pemuda Indonesia) iha momento neba, antes too iha historia ba Avo Xavier nian iha Jakarta.
Iha topiko ida nebe maka komisaun organizadora fo mai hau atu koalia konaba historia avo Xavier nia iha Jakarta no oinsa ligasaun ho ami nia organizasaun ida naran Moris Dame. Iha fatin nee hau nia belun lubuk ida nebe maka hau sei apresenta sira nebe maka hola parte no mos fundador ba Organizasaun Moris Dame iha tempo nebe.
Karik hau sei temi kolega sira nia naran bele hamrik. Kolega Bernardo Loemau, nia maka ami nia koordinador organizasaun Moris Dame bele hamrik. Uluk nia servisu iha PT. Indocement Indonesia iha Bogor, Jawa Barat. Agora dadauk nia servisu iha Banco Central iha Dili.  Kolega Camilo bele hamrik uluk hanesan militante no agora sai pengusaha. Ida maka hau nia belun tur hela dadauk nee irmao Afonso Caldeira hanesan avo Xavier nia subrino. Ida nee mos ami nia koordinador ba Moris Dame iha Bandung. Kolega sira nebe maka hau temi nee sira nee mak sei kompleta saida maka hau koalia iha nee la los no haluha balun karik kolega sira nee sei kompleta liu tan.
Historia ida nebe mak hau sei hatoo iha nee sei fahe ba parte rua. Preimeiro maka sei koalia konaba Organizasaun Moris Dame no oinsa no tanba sa mak organizasaun nee moris no mos oinsa ligasaun ba avo Xavier.
Progama tenaga Kerja
Iha tinan 1990 mais ho menus too 1996 liuba estado Indonesia antisipasi konaba isu politika konaba prosesu luta timor nian.  Guvernu Central Indonesia servisu hamutuk ho Governu propincia uluk koenesido hanesan propinsi Timor-Timur iha momento nebe senhor Ir. Mario Viegas Carracalao mak hanesan Governador. Antisipasaun konaba isu politik nee estado Indonesia servisu hamutuk ho Departemen Tenaga Kerja, Yayasan Tiara Indonesia no mos servisu hamutuk KNPI halibur joventu koase  900 – 1000 haruka ba Indonesia atu servisu iha neba,  iha hau dokumentasaun nee dadus konfletu.
Iha progama nee koenesido hanesan Programa Tenaga Kerja ka buruh ka trabalhador husi Timor ba servisu iha Indonesia.  Hau ho hau nia kolega balun nebe maka ohin hau temi mos hola parte iha programa ida nee. Hau ho kolega lubun hamutuk nain 72 ba servisu iha Kanindotex, Bawen, Jawa Tengah. Ami nia vencimento fulan 1 mak Rp.33.000. Kompara ho dollar agora mais-ho menus $4 USD ida hanesan nee fulan ida. Ho situasaun ida nee triste tebes. Ita nia hanoin no ita nia hakarak lahanesan ho realidade nebe maka ami  hasoru iha momento neba.
Iha eventu ida nee hau sei la koalia barak konaba  kondisaun iha fatin servisu hanesan buruh iha pabrik Kanindotex iha Bawen, Jawa Tengah. Hau lakohi koalia barak konaba situasaun ida nee tanba hau servisu fulan ida deit iha fatin neba.
Dalan ikus maka ami halo problema bebeik iha ami nia fatin servisu. No desizaun ikus mak ami hakarak fila ba timor. Maun Cico Kaslbuady nee ho senhor Lourenco too kedas iha ami nia fatin atu resolve ami nia problema. Ami hamutuk 13 fila ba Jakarta no hein dezisaun ikus atu fila ba timor. Maibe sira la brani ida atu haruka fila mai timor tanba estado Indonesia no militar sira antisipa ona katak see ami mak fila mai timor sei hamosu problema balun hasoru estado Indonesia.  Tan nee ami husu hakarak eskola. Ami balun ba tuir kursus komputador iha Bandung, balun ba Jogjakarta, balun ba Surabaya too 1992.
Iha tinan 1993 hau fila ba Jakarta no hela hau nia maluk studantes sira iha Jakarta no laiha atividade ida mais ho menus fulan 2 ida hanesan nee. Iha marsu 1993, hau hamutuk ho Sr Avelino Coelho no Basilio Araujo agora dadauk hela nafatin iha Indonesia ba hasoru avo Xavier iha Cijantung, Jakarta Timur.  Inkontru ida nee hanesan primeiroves hau hasoru senhor Xavier iha momento neba. Saida maka hau sei hanoin iha inkontru nee la koalia politik.  Hau lao hamutuk ho Senhor Avelino tanba ami koenesi malu antes iha Jakarta.
Liu tia tinan 2 nia laran hanesan nee maka hau foin hasoru malu ho avo Xavier no situasaun ida nebe maka ohin seluk.
Maibe antes ida nee hau hakarak fahe historia ituan katak saida maka dada ami no kolegas selu-seluk ba avo Xavier nia uma tanba iha situasaun ida nebe maka defisil susar atu esplika. Maibe kazu tuir mai nee maka sei hamosu ligasaun ho avo Xavier.
Iha hau nia dokumentasaun nebe maka hau tau iha nee sei hatudo faktus balun nebe maka relasaun forte liliu konaba problema trabalhador timor oan sira nebe maka servisu Jakarta no fatin seluk hanesan iha Jawa Kalimantan no seluk tan.
Iha fulan Setembro 1993 kolega ida naran Marcos Fatima ema Ermera oan ida servisu iha PT. Warna Primadana iha Cilincing, Jakarta Utara mka mate. Husi neba hau ho hau nia kolega belun Celso Oliveira nebe maka agora hela iha Inggris ho kolega solidaridade Indonesia fatin ida nebe maka hau servisu ba Institut Sosial Jakarta ami ba hare kolega nia mate no lori kedas jornalista. Husi kazu nee hau komesa ativu ona semana-semana hau sempre halo inkontru ho Marcos sira kolega sira nebe inklui mos Hercules.
Iha inkontru nee hau dehan ba sira agora ita mai iha ema nia rai oinsa maka ita bele organiza an atu hasoru situasaun sira hanesan nee.  Hau dehan lolos deit momento nee hau nein koenesi kolega sira nee. Hau sinti sira hanesan timor oan hau mos timor oan nebe maka ninia destinu ka nasib hanesan hau ba deit. Hau la dun preokupa hasoru kolega sira nee atu halibur malu.
Hau sinti orgulho tebes tanba bele organiza kolega sira nee atu bele fahe informasaun ba malu konaba sira nia situasaun servisu. Husi neba maka hau hetan informasaun barak katak maiorio kolega sira nee barak maka laiha servisu. Primeiro nee servisu iha duni servisu maibe la agoenta ho situasaun iha pabrik sira sai tia. Ita hatene ona katak kuando iha tia ema nia rai lai ha servisu saida maka sei akontense mai ita. Saida maka sira halo. Sira hamutuk ho Hercules kalan-kalan iha Tanah Abang nebe hodi hein bola guling. Sira nia moris mak iha fatin neba hanesan koenesido preman.
Ho Situasaun ida nee hau iha konsencia ida katak oinsa maka hau bele traba no dada hau nia kolega sira husi fatin neba.  Maka iha loron ida hau dehan ba sira ba halo protesta iha Menteri Tenaga Kerja neba. Hau ajuda sira halo statement  ida ba hasoru menteri tenaga kerja. Resultado husi nee kolega barak maka hetan servisu fala maibe barak liu maka sai fali husi servisu no ba nafatin iha Tanah Abang hamutuk nafatin ho belun Hercules.
Susar tebes atu sees husi situasaun ida nee.Saida maka hau hanoin hau dehan ba kolega sira. Oke  hakarak sai preman tenki sai preman nebe Professional. Situasaun ida agora nee hanesan sementara deit.  Hau dehan ba sira ita laiha skill ita nia skill brani mate nee deit buat seluk. Uza ita keberania para bertahan iha Jakarta.
Ida nee kazu premeiro. Kasu seluk kolega ida husi Viqueque naran Filomeno dos Reis mate iha Cengkarang, Jakarta Barat. Hau ba too mate uma tarde Perwakilan Timor neba obriga kolega sira hakoi deit kolega nee iha Jakarta.
Iha fali kasu seluk kolega ida husi Lospalos naran Amindo Lopes mos mate iha Jakarta Utara hotu. Husi mate nee ami konsege traba atu hakoi iha Jakarta.  Maibe ami hanesan fo ameasa ba perwakilan timor no mate isin lori kedas mai timor.
Oinsa no tanbasa mak Organizasaun Moris Dame, moris iha Jakarta.
Kazu seluk Petrus Tomae mate iha Indocement, Bogor. Hau rona kazu nee liuhusi jornal. Husi kazu nee mak hau koenese hau nia kolega Bernardo nebe maka tuur dadauk nee hasoru malu iha LBH Jakarta. Husi neba maka ami rua komesa intensivu ona hasoru malu bebeik hodi diskusi oinsa maka ita bele organiza malu. Iha momento nee, see la sala kolega Bernardo nee mak ba uluk iha avo Xavier nia uma depois tuir hamosu organizasaun Moris Dame.
Antes ida nee hau iha konseitu seluk konaba organizasaun nee. Maibe hau koaze fulan ida hanesan lakon tia kontaktu ho kolega Bernardo tanba deit intel sira buka hela hau ho kolega Celso.
Nee iha konstextu seluk maibe hau hakarak hatoo ba maluk sira katak tanba kolega timor oan sira nebe mak husi timor ba Jakarta hakarak halo Suaka Politik ka Assilu Politik ba Portugal. Hau iha dadus nebe maka iha hau nia dokumen nee husi tinan 1993 – 1996 timor oan barak mak husu suaka politik nee hamutuk nain 108. Karik mos liu nomor ida nee. Laos kolega hotu-hotu nebe maka ami bele ajuda no fasilita oinsa atu ba suaka politik ba kedutaan sira nee.
Saida maka ami bele facilitas. Buka fatin ba sira no oinsa buka mos hahan ba kolega sira nee no koalia ba sira konaba lokasi kedutaan sira nee.
Ida nee servisu ida lafasil. Tanba kolega sira nee barak mak sidauk hatene strutura cidade Jakarta nee oinsa. Lokasi kedutaan sira nee oinsa. Antaun saída maka ita halo. Halo inkontru ho kolega sira nee esplika didiak ba konaba lokasi kedutaan sira nee. No kalan maka ami survei kedutaan sira. Mais ho menus lokasi kedutaan segurança nee oinsa. Karik luta iha mais ho menus metru hira. Karik ita sai luta persiza menitu hira mak ita tama iha kedutaan sira. Karik lutu naruk liu oinsa ba kolega feto sira. Buka estratégia seluk ba kolega feto sira. Ami halo palsu dokumen halo sira nia kartu mahasiswa. Tropa hotu sira naran tau tuir naran ema Indonesia nia. Fatin  moris mos tau rai Indonesia hotu. Strategi ida nee iha duni resultado. Kolega feto nain rua Maria Sarmento (Nina agora hela iha Inggris), kolega seluk Odilia Victor mate tia ona iha Portugal. Nain rua tama duni iha kedutaan Australia iha loron 10 fulan Janeriro 1996.  Balu la konsege tama ba kedutaan militar Indonesia kaer tia kolega balun, husi neba maka komesa naksobu. Hau ho kolega tenki halai no subar tia iha Jawa Tengah koase fulan 1 resin.
Kolega suaka nain sira nee barak liu husi timor ba estudante iha Indonesia. Husi timor nee barak husi group vitima kazu 12 Novembru nia.
Hau ho kolega balun simu knaar ida nee oinsa bele fasilita kolega sira nee liu ba kedutaan sira hodi husu suaka politik.
Oinsa bele halimur atu organiza malu ho kolega Trabalhadore sira nee.
Komo momemto neba hasoru malu fatin mos susar nee bukan fatin 1 neba maka sentral hanesan taman mini Indonesia Indah. Fatin nee fatin rekreasi nia maibe ami uza ba inkontru. Husi neba ami komesa intensivu ona hasoru malu ho katuas nia uma. Semana-semana sabado no domingo ami nia fatin hanesan mos ami nia sekretariado moris dame iha avo Xavier nia uma.
Hau harakarak koalia ituan konaba dinamika organizasaun nee. Iha organizasaun nee ami nia strategi premeiro mak ami labele koalia politique.  Ami koalia konaba situasaun kolega sira iha servisu fatin no mos desporto hanesan joga bola.  Maibe kolega intim nebe maka hatene malu sempre fahe informasaun konaba problema timor nia. Nebe atu dehan karik Moris Dame nee hanesan rede ida oinsa atu fo konsencia ba malu konaba problema timor. Maibe ho meus oin seluk. Hanesan ita hamos malu no ikus mai lasu kolega sira nee ba rede pro ukun rasik –an nia.
Ami nia involvimento ho avo Xavier,  hanesan hau dehan katak foun-2 nee avo Xavier nunka koalia politika ida. Maibe saida mak nia koalia mak nee nia bele konta historia ida nebe maka dait ba futuru. Ezemplu nia dehan fatuk boot ida nebe maka bele toor oinsa maibe kuando loroloron bee musan ida turu nafatin iha fatuk nee loron ida fatuk nee sei nakfera. Hanesan mos problema timor nia. Imi lafiar aban bain ruma maka imi hare took. Komparasaun nebe maka avo Xavier koalia nee sai duni realidade.
Ita nia rai ida nee ema barak mak  mate nia ran nebe maka fakar rai ida nee sai duni realidade hanesan avo Xavier temi.
Historia 1978-1999
Durante tinan barak nia laran husi 1977 nia sai dadur ba Fretilin iha ailaran no ikus mai militar Indonesia husi batalyon 744 sira kaer nia iha Mota Dilor  tinan 1978 no lorin nia mai Dili no ikus mai Bali no transper ba Jakarta iha tinan 1983 ita nunka rona ninia pensamento konaba politika avo Xavier nonok deit.  Laos deit tanba atu koalia politik maibe ita nunka rona oinsa avo Xavier nia kondisaun moris nee oinsa.  Tanba avo Xavier militar Indonesia sira izola nia atu labele komunika ho ema timor.  Ita hotu hatene ona katak durante nia iha Bali barak liu nia hakiak kuda Panglima Udayana Jenderal Dading Kalbuady nia. Kuda nebe mak nia hakiak nee hamutuk 34 husi tinan 1979-1983. Semana-semana ninia vencimento maka Rp.1000 kompara ho dolar agora karik mais-menus $0.20 cent USD.  Kuda sira nebe maka avo Xavier hare husi nasaun seluk hanesan husi Australia, Inglatera, Pakistan, India no mos husi Sumbawa NTB (Nusa Tenggara Barat). Servisu hanesan Kuda atan nee avo Xavier halao durante tinan 4 nia laran.
Iha tinan 1983 wainhira Panglima Dading Kalbuady muda ba Jakarata avo Xavier mos ba hamutuk ho Panglima nee hela iha Jakarta.
Ativida nebe maka Avo Xavier halo Jakarta mak hanesan servisu iha kiintal Dading Kalbuady ni fen nia hakiak anggrek. Iha ninia esperiencia avo Xavier dehan katak anggrek nee ita kuidado didiak liu fali ita oan sira sei bebe. Nee situasaun ida nebe mak defisil tebes. Ninia vencimento la tun la sae nafatin Rp. 1000.
Saida maka ita hatene konaba situasaun ida nee tanba avo Xavier hanesan dadur iha militar Indonesia sira nia liman iha Jakarta. Isemplu nia tuir inkontru iha AETL (all inclusive  intra east timorense dialogue) iha Austria no mos iha Englatera dala barak liu atu koalia nee avo Xavier husu dispulpa mak barak liu wainhira atu koalia. Ita tenki haraiak an iha delegasaun Indonesia sira nia oin wainhira atu koalia ho iha forum nee. No dispil liu wainhira avo Xavier hakarak atu koalia personal delegasaun timor oan sira iha rai liur nebe maka tuir iha inkontru nee.
Hau reflesaun badak konaba tinan naruk avo Xavier la involve ka ninia pensamento ba politika timor nian. Hau hanoin nia nonok tanba lahalo politika. Maibe nonok mos hola parte ona konaba politika. Tanba iha momento neba nia nonok tanba problema siguransa nia hanesan dadur nebe maka destrado ba rai Indonesia.


[i]Dokumento nee prepara husi Helio Freitas, hatoo iha seminariu loron 2 iha salaun UNTL, Dili 7-8 Setembro 2012.

No comments: