Wednesday, May 30, 2012

Formação Hamutuk Pattiro Jakarta


Buka matenek labele kolen atu aprende no lahatene labele moe atu husu ba matenek nain no mos labele subar matenek nebe maka iha hodi fahe ba ema seluk. Bazeia ba lisaun iha leten nee maka artigu ida iha atu fahe informasaun ruma konaba formaçáo iha Jakarta foin lalais nee. Artigu ida nee hakerek kona ba materia nebe peskizador Parlamento Nasional hetan durante semana ida iha Jakarta. Hein katak esperiencia hanesan bele fahe husi deputados no mos staf seluk nebe maka halao studu komparativo ka formaçao barak iha nasaun seluk.
Antes atu tama ba materia treinamento nian, sei koalia uluk tanba sa no oinsa prosesu treinamento hahu, husi preparasaun materia toó treinamento nebe fasilita husi ONG Pattiro. Formação ka treinamento nebe hala’o iha Jakarta durante loron lima (5),  27 Outubro - 1 Novembru 2011, fahe topiku balun hanesan tuir mai nee: 

  1. Introdusaun
Treinamento prepara husi staf Diresaun Peskiza nee rasik, hahu husi design materia, kontaktu fasilitador, tempu no mos orcamento nebe maka uza ba programa nee. Materia nebe prepara husi diresaun nee, foka liu ba oinsa atu halo peskiza ida tuir metodolojia nebe simples no fasil atu aplika. Loos duni katak treinamento barak maka durante nee peskizador sira hetan liu husi servisu hamutuk ho Fundasaun Azia iha Timor-Leste, maibe atu buka aprende no hasae kapasitasaun persiza iha kontinuasaun mos husi fatin seluk. Tan nee diresaun peskiza halo kontaktu ho ONG Pattiro iha Jakarta konaba preparasaun materia no mos orcamento nebe uza ba programa nee. Programa nee mos realiza tamba servisu hamutuk entre Fundasaun Azia, Sekretariado Parlamento Nasional no mos ONG Pattiro–Jakarta nudar fasilitador.
  1. Materia Treinamento
Materia treinamento nebe prepara husi diresaun peskiza hanesan proposta ida no haruka ba ONG PATTIRO iha Jakarta. Materia hirak nee mak. Metodolojia Peskiza, Analiza Orçamento, Analiza Politika, Rezolusaun Konflitu no ikus liu maka Planu Estrategiku.

Metodolojia Peskiza
Iha metodolojia peskiza nee iha materia barak maka koalia konaba komponentes no prosesu oinsa halao peskiza ida nebe maka iha kualidade.
Faze premeiru husi aktividade peskiza maka rekoilla dadus (pengumpulan data). Iha prosesu balun nebe maka peskizador tenki halo. Premeiro oinsa factor-factor nebe maka bele konsidera hanesan ba dadus hodi halo analiza. Segundo hanesan prosesu halibur dadus dalaruma dadus sira nee la too no oinsa halo interpretasaun ba dadus sira nee. Terceiro dadus nee hanesan dadus ida no oinsa resultado no interpretasaun husi dadus nee.
Iha faze analiza dadus, buat nebe peskizador sira tenki halo mak hanesan; kalkulasaun, kategorizasaun, interpretasaun no mos komprende katak oinsa dadus sira nebe maka halibur ona sai hanesan informasaun ida nebe importante.

Peskiza Kualitativa
Iha peskiza kualitativa, buat rua maka peskizador sira sempre uza maka hanesan tuir mai nee; peskiza nebe maka uza resultado komparativo kualitativu hanesan resultado analiza, no seluk fali maka uza metode random sampling (variedades oin-oin) hanesan metode nebe maka presiza iha peskiza kualitativa. Maibe peskiza kualitativa nee mos iha vantazen no mos desvantazen.
Vantazen:
- Elabora kbiit representasaun populasi
- Minimaliza rezultado peskiza nebe maka kabur no ladun los
- Rezultado peskiza fasil atu apresenta

Desvantazen:
- Fatores sira nebe maka susar atu detekta laiha struktura dadus nebe los
- Susar atu detekta ide foun nebe maka mosu.

Peskiza Kuantitativa
- Peskiza kuantitativa hanesan peskiza nebe bele komprende fenomena, no mos oinsa fenomena nee mosu.  
- Rezultado peskiza kuantitativa tanba influeza husi peskizador nee rasik  no oinsa buka dadus no mos interpreta dadus ka fatores sira.

Vantazen Peskiza Kuantitativa:
- Bele foó esperasaun realidade klean no detailadu
- Sempre hetan rezultado no deskobre buat foun nebe maka iha presfektiva

Desvantazen Peskiza Kuantitativa:
- Aspektu represaun husi amostra nebe maka halo peskiza ba
- Netralidade (liberdade nebe maka bias) diferencias peskizadores hanesan mos perguntas nebe maka sempre mosu.

Alende metodolojia peskiza nebe maka temi iha leten, fasilitador mos foó materia seluk hanesan metode deduktiva no induktiva. Metodolojia deduktiva hahu husi buat nebe maka jeral ba asuntu espesifiku. Design konaba deduktiva maka hahu husi teori ba hipotesa no mos koko ho fatores. Metode ida nee vantazen ba fenomena atu tuir lei espesifiku ruma (tama iha vigór  grand theory no taka ho fenomena hotu).  Peskiza ho metode deduktiva, halai liu ba buka provas atu foó desvantazen ba design teori sira.
Vantazen husi peskiza deduktiva:
-       Lojiku nebe maka iha fácil atu hahu
-       Perguntas ka save bele haluan husi teoria ka normais jerais sira.
-       Rezultado peskiza hanesan justifikasaun ida konaba sala – loos, tan nee bele uza ba peskiza sira nebe maka hanesan avaliasaun.

Desvantazen husi peskiza deduktiva:
-       Ladun uza atu komprede konaba metas sira nebe maka foun
-       Ladun uza ba rezulta rekomendasaun nebe maka halai liu ba asaun ruma

Metode peskiza induktiva iha kontradis ho peskiza deduktiva. Iha deduktiva, ita aprende peskiza husi buat jeral ba espesifiku no iha metode induktiva, ita aprende peskiza husi buat nebe espesifiku ba asuntu jeral. Metodolojia ida nee mos halai liu ba observasaun no esperiencia pessoal konaba metas ruma.  Prosesu ka metas nebe maka uza iha peskiza induktiva maka husi observasaun, pola, hipotesa no ikus liu maka hare teoria nebe maka uza ba peskiza ida. Peskiza induktiva nee hare liu konaba objetivo teoria dezenvolvimento ka modelu foun nebe maka espesifiku liu.

Vantazen husi peskiza induktiva:
-       Resultado peskiza bele fo’o komprende lalais konaba metodolojia foun
-       Rekomendasaun husi rezultado peskiza bele halai liuba asaun.

Desvantazen husi peskiza induktiva:
- Rezultado peskiza dala barak kritika no bias tanba teoria nebe uza iha peskiza nee laos teoria jeral.

Husi metodolojia peskiza nebe maka apresenta iha leten hamosu aspetu praktika nebe maka bele hetan iha ita nia servisu atu uza ba peskiza ka peskizador sira tenki hare liuba buat hirak nebe maka temi iha leten. Hanesan metodu peskiza oinsa maka ita uza no tanba sa no mos hamosu perguntas nebe maka iha relasaun ho metode peskiza sira nebe maka temi iha leten.

Policy Analysis
Materia segundu nebe aprende husi treinamento nee mak policy analysis (Analiza Politika). Materia nee kona ba saida loos maka policy analysis nee rasik. Policy analysis katak siencia ida nebe maka koalia kona ba rezultado informasaun relevante ho politika publiku (Weimer &  Vining) ba analiza politika dezenvolvimento). Siencia seluk mos koalia konaba analiza nebe maka hatoó hanesan informasaun basiko ida ba politikus sira atu hola desizaun (E.S. Queda). Iha analiza politika mos akumula displina siencia no mos profisaun oi-oin. Ninia objetivo maka oinsa atu esplika konaba evolusaun no mos kona ba prespektiva (Duncan Mac Rae). Ideas matenek nain nebe maka sita iha leten hanesan definisaun jeral konaba analiza politika.
Maibe iha prosesu analiza politika nee oinsa resultado analiza nee sai hanesan konselhu. Husi neba maka sei foti asaun politika. Desizaun politika nebe maka foti persiza mos orcamento no mos iha vantazen sosial ba grupu komunidade balun maibe mos foó desvantezen ba komunidade seluk.
Tan nee husi prespektiva analiza politika nee, iha prosesu nebe maka tenki tetu didiak wainhira rezultado analiza politika sai hanesan konkluzaun ida atu tau iha lei ka asaun politika. Iha prosesu analiza politika, persiza mos hare komponentes balun maka hanesan problemas, formulasaun, adopta, implementasaun no ikus liu maka avaliasaun.

Analiza Orçamento
Atu analiza orçamento, base fundamental maka tenki komprende no oinsa atu analiza orçamento. Tan nee iha prosesu atu analiza orçamento tenki komprende lian-fuan save orçamento nia hanesan base fundamental atu analiza orçamento maka hanesan subtansia orçamento, base orçamento no mos problema orçamento nee rasik. Subtansia orçamento katak oinsa ita komprende konaba prosesu planeamento, receitas no mos despezas iha periodo ida ka periodo agora no mos periodo tuir mai ho tinan ida ka tinan rua no selu-seluk tan.
Base orçamento maka atu komprende konaba limitasoens orçamento no nesecidade bara-barak iha periodo ida no persiza defini wainhira no nesecidade ida nebe tenki dimenui uluk no persiza defini tempu atu dimenui nesecidade no mos tempu nebe maka atu halibur osan.  Tanba nee maka iha prosesu orçamento mosu probema orçamento nee rasik maka tenki defini nesecidades importantes ida nebe tenki dimenui. Defini mos fontes receitas sira nee mai husi nebe atu minimiza tempu nebe maka limitado no realizasaun orçamento no planeamento simu receitas no despezas no mos oinsa atu sukat tarjetu no receitas no ezekuta orçamento.
Analiza orçamento mos tenki komprende konaba prinsipius orçamento hanesan transperencia, disiplina, justu, efesiensia ho efektividade  no mos rasional no sukat oinsa atu uza osan.  
Alende iha prinsipiu orçamento sira nebe maka temi iha leten, orçamento nee mos iha dilema hanesan orçamento ida nebe maka metin (ketat)  kontra fleksibelidade, bottom up kontra sistematisasi, alokasaun ba desenvolvimento kontra governantes (aparat) no sectoral kontra prioridade desenvolvimento.
Dilema orçamento hanesan fatores ida nebe maka sai preokupasaun no mos kontra prinsipius orçamento sira nebe maka temi iha leten. Tan nee Estado ka Governu nebe maka sai regulator ba orçamento estado nian tenki hatene oinsa alokasaun orçamento atu regula kresimento ekonomiku no mos dimenui nesecidade publiko. Estado ka Governu tenki hatene oinsa atu halo estabilizasaun atu regula konaba inflasaun no mos imprego iha nasaun laran. Estado mos tenki hatene konaba distribuisaun orçamento iha justisa sosial ka lae. Ida nee knaar Governu nian hanesan regulador ba orçamento estado. 
Husi alokasaun orçamento sira nee bele difini katak saída maka sai prioridade governu ba orçamento ida nee. Se orçamento estado nebe maka ezekuta la tuir prosesu jerais sira nebe maka temi iha leten maka sei hamosu korupsaun.  

Identifikasaun Sasakat Korupsaun
Materia importante nebe maka hetan husi treinamento nee ida seluk maka konaba sasakat (celah) korupsaun. Korupsaun ka uza sala osan bele analiza husi estruktura orcamento no mos husi prosesu orcamento. Husi estruktura orcamento uza sala osan bele analiza husi komponentes receitas no mos husi komponentes despezas. Husi prosesu siklus ida nee, uza sala osan bele analiza husi prosesu planeamento, aprovasaun, ezekusaun to’o prosesu avaliasaun no auditoria.
Uza sala osan ka korupsaun bele hare husi estruktura orcamento hanesan despezas no receitas. Iha asuntu rua nee mosu perguntas barak konaba osan hira maka despezas estado nian ba tinan ida nee no osan sira maka governu aloka ba despeza ba saida deit, oinsa maneira halao despezas sira nee no see maka halao despezas sira nee. Perguntas hanesan mos konaba receitas estado nian. Receitas estado tinan ida nee hira, receitas sira nee mai husi nebe, see maka halao kobransa receitas sira nee no oinsa halao kobransa. Ida nee hanesan perguntas klasika nebe maka mosu atu identifika konaba sasakat korupasaun iha nasaun laran.
Husi komponentes receitas, uza sala osan baibain modus nebe hatun potensia receitas, modus ida nee ho inglesh dehan “mark down”. Husi komponentes despezas, uza sala osan baibain modus nee hasae ho haboot orcamento ba uza privado no mos grupu balun. Modus ida nee baibain ho inglesh dehan “mark up”.
Perguntas save nebe maka temi iha leten atu identifika sasakat korupsaun bele hare husi kazu hanesan husi estruktura receitas, estruktura despezas, prosesu ezekusaun no mos prosesu auditoria.
Materia konaba sasakat korupsaun ida nee hanesan materia importante ida oinsa analiza orcamento bele hare no identifika konaba korupsaun tuir prinsipius jerais sira nebe maka temi iha leten konaba sasakat korupsaun.  Ita laos deit hatene konaba Ministeriu ida osan hira maka aloka ba kapital minor, despezas no selu-seluk tan maibe hatene klean liutan alokasaun orcamento sira nee tuir duni prinsipius orcamental ka lae. Ida nee perguntas boot ida ba cidadaun hotu-hotu atu tau matan ba prosesu orcamento iha nasaun laran. 

Resolusaun Konflitus
Materia tuir mai konaba resolusaun konflitus. Konflitus sempre mosu iha sosiedade nia leet hanesan lisan ida. Iha situasaun tolu (3) konaba konflitus nebe maka iha sosiedade nia leet maka hanesan; diferencia, disputa no konflitu. Tanba nee tenki komprende konaba direferencia ida ho seluk.  Diferencia nee situasaun orijinal husi ema. Disputa mosu tanba iha ema rua ka grupu ho liu, kompete ida ho seluk atu hetan sasan husi ema seluk. Konflitus nee hanesan situasaun ida nebe maka akontese ema ida ka grupu komunidade ho liu halao asaun ruma atu halakon direitu ema ka komunidade seluk konaba sasan ruma husi ema seluk atu hadau.
Husi konflitus sempre hamosu mudansa iha komunidade nia leet. Iha situasaun rua (2) nebe maka sempre husi rezultado konflitus. Maka iha vantazen no desvantazen iha komunidade nia leet. Vantazen katak iha konflitu bele hamosu mudansa positivu iha sosiedade nia leet. Desvantazen katak rezultado konflitu lori komunidade sai terus liutan no la hetan oportunidade diak iha sira moris lor-loron.
Tan nee ita tenki hare ba problema konflitus labele hare husi parte negativu deit maibe hare mos husi parte positivu nebe maka bele fo mudansa iha sosiedade. Ezemplu energia husi loron bele estraga no mos bele foó kreativu. Fatuk ruma kose malu bele hamosu ahi maibe mos bele halo kaber ba fatuk nee rasik. 
Materia resolusan konflitus nee atu foó hanoin mai ita katak husi konflitus sempre rai hela memoria iha sosiedade nia let. Talvez husi konflitus nee ita aprende buat ruma atu lao ba oin. Esperiencia Timor-Leste nia foó lisaun barak mai ita konaba konflitus pasado. 

Planu Estrategiku
Materia ikus nian husi treinamento nee maka planu estrategiku. Planu estrategiku nee koko atu aprende konaba ativida saida deit konaba desenvolvimento iha futuru. Husi planu konaba atividade desenvolvimento sira nee bele hare katak orcamento hira maka sei aloka ba projetu ida iha tinan ida nee ka tinan tuir mai. Husi neba maka bele hare konaba regulamento ka lei hira maka governu tenki halo no mos lei hira  maka sei hetan revisaun. Iha planu nee mos bele hare ona konaba tarjetu governu nia hanesan prioridade ba desenvolvimento no modelu desenvolvimento nebe maka serve ba publiko nee oinsa.
Prioridade husi planu strategia maka tenki hare husi planu governu nia konaba desenvolvimento iha futuru. Tan nee peskizador sira tenki mos trasa planu atu hare ojetivo desenvolvimento ba groupo tarjetu sira nee foó duni vantazen ekonomiku ka lae. Iha implikasaun desvantasen ba groupo tarjetu sira nee oinsa. Pro zemplu konaba meio ambienti, disputa rai no selu-seluk tan. 
Husi planu strategia sira nee tenki hare konaba vizaun no misaun husi planu ba desenvolvimento nee tuir duni objetivo ka lae, iha vantazen no mos mudansa iha sosiedade ka lae, tuir duni regulamento sira nee ka lae. Husi problema sira nebe maka temi iha leten relasionadu ho planu desenvolvimento nasional  peskizador sira tenki mos iha ajenda rasik atu antisipa saida los sai priorida atu halao iha futuru no seluk tan. Liliu peskizador sira tenki hare husi planu orcamento estado ba tinan ida nian bele identifika ona prioridade politika governu nia ba desenvolvimento nasional nee saida. 

C. Vizita ba DPR-MPR, LoC no Komisaun Informasi
Iha treinamento nee mos aproveita tempu ba vizita iha Parlamento Indonesia (DPR-MRP) iha Jakarta loron 31 fulan Outubro 2011. Vizita iha fatin nee hasoru malu ho staf tekniku sira nebe maka durante nee foó suporta ba lalaok servisu iha Parlamento Indonesia nian.  Liu-liu harosu malu ho peskizador no mos ho staf seluk nebe maka prepara ajenda nasional konaba prosesu legislasaun iha Parlamento Indonesia nian.
Lalaok servisu peskizador Indonesia iha modelu rua (2) nebe maka baibain sira halao maka hanesan hetan proposta husi membro parlamento maka sira sei halo peskiza no buka dadus no seluk fali maka peskiza tuir sira nia planu rasik no laos proposta husi membro parlamento.
Tipo relatoriu nebe maka sira foó ba membro parlamento sira tuir modelu Kongresu Amerika hanesan modelu nebe maka uza mos iha peskiza Parlamento Timor-Leste nian. Modelu seluk maka tuir maneira sira nia rasik katak halao tuir kultura sira nia. Modelu seluk maka peskiza konaba asuntu ruma nebe maka presiza tempu nebe maka naruk no mos rezultado peskiza hetan valorizasaun husi LIPI (Lembaga Ilmu Pengetahuan Indonesia) hanesan dezenpenhu ba peskizador sira hodi hasae sira nia kareira.  Husi rezultado peskiza nee hetan ona aprovasaun husi LIPI maka sei halo livru.
Rezultado peskiza husi Parlamento Indonesia hetan mos vantazen no desvantazen konaba rezultado peskiza husi membro Parlamento Indonesia. Vantazen katak rezultado peskiza nee bele hasae sira nia kareira hodi hasae sira nia nivel, desvantazen katak rezultado peskiza Membro Parlamento sira sei la lee tanba peskiza nee nakonu ho siencia, pagina barak  no mos tempu limitado atu lee.  Tanba membro parlamento sira presiza peskiza ida nebe praktis no bele komprende lalais konaba asuntu.
Peskizador sira nebe maka servisu iha fatin nee hotu-hotu Graduado Mestrado no Doutor, sira mos bele buka osan rasik atu foó bolso estudo ba staf sira ba hasai Mestrado iha nasaun seluk no mos iha universidade kuinesido iha Indonesia nee rasik. 

Komisaun Informasi Indonesia
Iha loron 1 fulan Novembru 2011, ami mos ba hasoru malu ho membru Komisioner Komisaun Informasi Indonesia iha edificio Pattiro iha Tebet Dalam, Jakarta Selatan.  Husi inkontru informal nee hetan informasaun konaba estabelesemento Komisaun Informasaun. Tuir membro komisioner  Ahmad Alamsyah Saragih katak, komisaun harii iha tinan 2008 liuba. Atu harii komisaun nee presiza tinan  walu (8) tanba esbosu lei konaba asesu informasaun nee hatoo ba Parlamento Indonesia tinan 2000 maibe foin hetan aprovasaun iha tinan 2008.
Objetivo harii komisaun nee atu foó informasaun ba publiko. Tuir esperiencia Indonesia iha tempu passado informasaun nebe maka presiza publiko hatene defisil atu asesu, tan nee estabelecemento komisaun bele foó vantazen ba ema hotu-hotu atu asesu informasaun nebe maka publiko presiza. Maibe iha informasaun balun nebe maka publiko labele asesu maka informasaun konaba  siguransa nasional, servisu intelejen no kazu ruma nebe maka sei iha prosesu investigasaun, ida nee labele loke ba publiku.
Alende hasoru malu ho Komisaun Informasaun ami mos ba vizita Library of Congress (LoC) iha Jakarta. Iha inkontru nee hetan esplikasaun konaba lalaok servisu LoC nian husi staff senior LoC nia iha fatin refere. Lalaok servisu LoC nian maka hanesan foó suporta informasaun ba membru Congress iha Amerika. Informasaun sira nee hetan husi jornais, internet, livru no mos husi fontes seluk hanesan intervista ho ema nebe maka hatene konaba isu ka asuntu ida. Informasaun sira nee haruka ba congress Amerika semana ida, dala ida maibe iha tempu ruma sira mos haruka informasaun lor-loron ba congress, depende tipo informasaun no depende ba situasaun iha rai laran.

Dili, 15 Dezembru 2011
Helio Freitas

No comments: