Friday, July 01, 2011

Kualidade Edukasaun

Edukasaun hanesan determina destinu nasaun ida nia. Iha mundo agora futuru nasaun determina mos husi sistema globalizasaun no mos mudansa husi siensia. Tanba edukasaun sai aspirasaun ba siensia. Tanba nee kuando nasaun nee lao ba oin la kaer metin sistema edukasaun antau bele mos apeta ba futuru nasaun nia. Tan nee ita bele hanoin hamutuk katak iha seclo XXI problema edukasaun oinsa maka bele responde seclo XXI nee ba oin (Sindhunata, hakerek iha prefacio ba Mochtar Buchori, Pendidikan Antisipatoris, Kanisius 2001).
Pergunta nee maka sai preokupasaun ba Prof. Dr. Mocthar Buchori iha ninia livru nebe maka temi iha leten. Pergunta no preokupasaun nebe maka matenek nain hakerek iha livru nee sai hanesan sasukat ida oinsa maka sistema edukasaun iha tenpu global ka globalizasaun nee bele responde ho problema global iha mundo relasiona ho mudansa teknologia no siensia agora. Idea nebe maka hamosu pergunta boot ida nee maka iha relasiona ho mudansa siensia agora, no mais ho menus hanesan idea ida nebe maka oinsa maka bele antisipa saída los maka bele mosu husi globalizasaun relasiona ho mudansa siensia agora.
Perguntas ida nee atu dada besik mai ho sistema edukasaun iha Timor-Leste saída los maka ita bele responde iha nasaun ida nee agora ba oin. Realmente situasaun aktual konaba sistema edukasaun sai preokupasaun boot ba governo, parlamento nasional no mos ba publiko tomak. Susar ituan ita atu fahe hanoin hamutuk konaba saída maka Dr. Sindhunata temi iha leten konaba antisipasaun siensia global iha seclo XXI agora no mos seclo tuir mai.
Problema Timor-Leste oinsa maka ita bele hanoin hamutuk atu hadia sistema nee ba oin maibe sistema edukasaun iha nasaun ida nee sai agenda politik nebe maka sempre hamosu pró kontra no susar atu hetan solusaun. Parlamento Nasional hanesan orgaun importante nebe maka fo osan ba Governu liu husi Orçamento Estado hatene katak osan nebe maka aloka ba edukasaun tenki sai realidade atu garante futuru nasaun nee ba oin. Tanba edukasaun hanesan airin ba nasaun tan nee prinsipalmente edukasaun tenki suporta makaas husi governu.
Maibe realidade nebe maka sempre hamosu vantazen desvantazen iha Uma Fukun Parlamento Nasional konaba problema edukasaun. Prozemplu merenda eskolar nebe maka sai programa principal atu implementa iha eskolah sira iha teritorio sai problema boot. Eskolah barak too agora sidauk hetan merenda eskolar. Balun nebe maka hetan ona merenda eskolar hetan problema hanesan fos no koto wainhira too iha responsável eskolah sira nia liman ho kondisaun at. Balun mos hetan preokupasaun konaba oinsa maka atu tein an-an ba eskolah sira tanba ai sunu ka uza gás deit mos laiha. Ai sunu laiha tanba governo bando labele tesi ai tanba problema ambienti. Maibe governo mos haluha oinsa maka bele fo solusaun ba ida nee.
Alende nee mos problema infraestrutura nebe maka sai problema boot iha nasaun laran. Eskolah barak maka laiha mesa-kadeira. Eskolah barak maka kondisaun ladiak. Prosemplu foin dadauk ita hare iha TVTL fo sai konaba eskolah sekundaria iha Becora kondisaun ladiak, estudante sira tuir iha rai deit atu estuda. Ministru edukasaun mos rekonese katak problema infraestrutura sai difikulta ba distribuisaun merenda eskolar ba eskolah sira iha áreas remota sira. Alende estrada Ministru mos haluha katak infraestrutura ba eskolah mos ministru nunka temi iha ninia agenda politik.
Fisikamente eskolah sira nebe maka kondisaun diak iha Díli laran hanesan eskolah privado sira maka iha kondisaun diak. Prosemplu eskolah Katolik sira iha Canosa, São Pedro, São Paul VI, Maria Auxiliadora no selu-seluk tan. Eskolah publiko nebe maka iha kondisaun diak iha Díli maka eskolah nomor 1 Farol, Díli no mos eskolah primaria ida iha Vilaverde, Igreja Catedral nia oin. Maibe eskolah rua nee laos governu maka halo ida nee doadores sira maka renova eskolah rua nee.
Problema nee sai mos pergunta boot ida ba deputado sira iha Parlamento Nasional atu hakilar no diskuti saída los maka naksalan iha dalan konaba ezekusaun osan ba setor eduksaun iha nasaun ida nee.
Tan nee pergunta boot nebe maka DR. Gabriel Sindhunata hatoo iha prefacio ba livru Prof Dr. Mocthar Buchori nee susar atu responde no mos fo hanoin konaba kondisaun real problema kualidade edukasaun iha Timor-Leste. Maibe atu hakarak ka lakohi nasaun nee atu lao ba oin mais-menus pergunta no preokupasaun Sindhunata nia iha leten sai mos preokupasaun ba lideransa politiko sira iha nasaun ida nee atu hanoin konaba futuru edukasaun. Hanoin konaba futuru edukasaun otomatikamente ita mos hanoin ona konaba futuru nasaun no oinsa ita mos bele fo hanoin no antisipada saída los maka sei mosu lalaok siensie no globalizasaun tuir mai. Tan nee Info Parlamentar ba edisaun ida nee fo hanoin mos ba deputado sira katak laos deit agenda politik oinsa partido politik sira antisipa elisaun tuir mai atu mai fila fali iha uma fukun ida nee maibe oinsa deputado sira mos hanoin katak eduksaun ida nebe diak fo mos garanti ba hanoin diak ida nebe atu hadia nasaun iha futuru. Tan nee pergunta no preokupasaun Sindhunata iha leten laos ita responde ho osan la too no mos infraestrutura ladiak maibe lalaok siensia nee obriga ita atu hanoin no artikula sistema edukasaun nebe diak ho kualidade iha futuru.

No comments: