Wednesday, March 15, 2006

Media Guarda Demokrasia

Husi: Helío Freitas

Aviaun Bronco OV-10 laos soe bomba napalm maibe halo deit spionase bá inimigu nia fatin, Sr, Juwono Sudarsono, Ministru Defesa, Indonesia, Revista Gatra, 4 Fevereru 2006.

Historia Timor-Leste hahu husi 1975-1999 imprensa ninia papel inportante tebe-tebes bá libertasaun nasaun ida ne’e. Komesa husi kazu Balibo, 16 Outobro 1975 jornalista estranjero nain lima (5) maka sai vitíma bá ukupasaun Indonesia iha momento neba. Jornalista estranjero nain lima (5) sai vitíma maka tuir mai ne’e: Gregory John Shackleton, Anthony J Steward, Malcolm H. Rennie, Brian R. Peters no Gary J. Cunningham. Jornalista nain lima (5) ne’e sira nia idade kiik liu maka husi 21-29 anos . Jornalistas sira ne’e sai vitíma wainhira sira halo kobertura kona-bá ukupasaun Indonesia ilegalmente tama iha Batugade, Balibo (Bobonaro) iha Outobru 1975. Kazu ne’e kuinesido liu iha estranjeiro hanesan Balibo Five nebe maka hakerek husi jornalista Jill Jollife iha livru ida ho naran Cover-Up: The Inside Story of The Balibo Five, 2001. Livru ne’e mos hakerek historia vialosaun direitu umana iha tempo pasado hanesan kazu Kraras (Viqueque) 1983, no kazu seluk-seluk tan.

Invasaun husi militer Indonesia iha loron Domingo, 7 Dezembru 1975 iha Dili, mos jornalista ida naran Roger East husi Australia lakon to’o agora ema ida lahatene ninia rate. Iha Masacra Santa Cruz, Dili 12 Novembru 1991 mos jornalista ida naran Kamal Bamadhaj husi nasaun Malaysia maibe tuir identidade legal nia husi Nova Zelandia , sai vitíma iha momento neba.

Povo Timor prepara an bá refrendum iha loron 26 Agostu 1999 jornalista Timor oan ida (Bernardino Guterres) mos mate iha Kuluhun, Dili husi hahalok militer Indonesia sira. Atu hakotu funu harosu invasor Indonesia liu tia refrendum 30 Agostu 1999 mos jornalista estranjeiro nain rua (2) maka sai vitíma tan hodi hakutu brutalista militer Indonesia iha Timor. Jornalista nain rua (2) maka sai vitíma tuir mai ne’e; Agus Mulyawan husi Indonesia, servisu bá Asia Press mate hamutuk Madre sira husi Canossiana iha Lautem 25 Setembru 1999, husi hahalok milisia groupu Alfa ne’ebé maka militer Indonesia sira hari’i. No Sanders R. Thoenes mati besik Igreija Becora, Dili nia oin iha loron 21 Setembru 1999 .

Adelino Gomes, jornalista ida husi Portugal momento militar Indonesia sira ukupa iha Batugade (Bobonaro) nia hamutuk Falintil no pupulasaun balu sae bá foho lao ain deit liu husi Atsabe, Ermera depois maka tun mai Dili no desloka bá Ataúro antes invasaun 7 Dezembru 1975 .

Ukupasaun Indonesia komesa husi Dezembru 1975 to’o iha 1989 ita bele dehan Timor-Leste hanesan moris iha nakukun bá komunidade internasional tamba militer Indonesia domina makaas iha Timor momento ne’eba. Jornalista estranjero nunka tama rai ida ne’e atu halo kobertura. Jornalista sira ne’e maka halao kobertura iha Timor tenki tuir politika Jakarta no militar Indonesia nia. Knaar jornalista tenki tuir militar sira nia obrigasaun, hanesan brifing uluk wainhira sira halo sira knaar jornalismo nian. Ita bele dehan liberdade jornalismo iha memento ne’eba laiha hanesan tempo agora.

Informasaun nebe maka sai husi Timor bá rai liur liu husi kanal kladestina. Kanal klanestina ne’ebé momento iha kuinesemento bá rai liur ita bele dehan Padre no Madre sira maka halao knaar ida ne’e. No ema cidadaun balu maka halo milagre no fó sai informasaun bá rai liur. Knaar ida ne’ebe perigu tebe-tebes wainhira militar sira hetan ema sira ne’e sempre hetan tortura no vialosaun oin-oin, no barak maka sai martir bá rede informasaun nian.

Reportase especial ida husi Revista Gatra, halo kobertura kona-ba CAVR (Comissão Acolhimento Á Verdade é Reconsiliasaun) nebe komentariu husi Ministru Defesa Sr. Juwono Sudarsono koalia kona-ba Aviaun Bronco OV-10 nebe maka tuir CAVR katak Aviauan ne’e maka uza bomba Napalm momento ukupasaun Indonesia. Ministru Defesa hatan katak Aviaun Bronco Ov-10 ne’e halo espionasi bá inimigu nia fatin deit, laos soe bomba .

Atu hatan bá komentariu hanesan ne’e diak liu ema ne’e maka sei moris no saksi durante ukupusaun Indonesia hanesan refusiado bá hela iha foho Matebian, Kablaki no fatin seluk iha teritorio Timor-Leste nian momento neba.

Ita bele imagina to’ok kona-ba imprensa Indonesia iha tempo ukupasaun militer Indonesia nian. Revista Gatra, hanesan Revista ida nebe boot segundo lugar iha Indonesia laiha balancu kuando koalia kona-ba problema Timor, to’o agora, apalagi tempo uluk(?). Imagina deit bá(?). Ne’e henesan ezemplu kiik ida husi imprensa Indonesia kona-ba problema Timor.

Iha tinan 1989 guvernador senhor Ir. Mario Viegas Carrascalão hanesan representa povo Timor nian halo politika ida bá Jakarta atu loke dalan bá ema hotu-hotu atu bele mai hare dezemvolvimento estado Indonesia halo iha Timor. Iha momento ne’e ita bele dehan imprensa estranjero sira komesa tama iha Timor. Maibe antes tinan 1989 hau hanoin katak jornalista estranjero balu mos tama ona iha Timor. Hanesan husi Portugal mai visita bá dadur sira iha Ataúro, refujiado sira iha Laga (Baucau) no fatin seluk-seluk tan.

Jornalista Jill Jollife ema ne’ebé hanesan jornalista ne’ebé livre nia mos halo kobertura makaas bá problema Timor nian komesa husi hari’i partidu to’o iha komplitu partidu iha Agostu 1975 to’o Timor liberta mos, ninia knaar nudar jornalista no ninia komitmentu bá Timor to’o ohin loron nafatin bá nasaun ida ne’e. Ita bele dehan Jill Jollife no ema peskizador seluk-seluk hanesan Prof. John Taylor (London), Prof. Akihisa Matsuno (Japaun), Dr. Helen Hill (Australia), Anthony Golsdtone (London), Dr. Georje J. Aditjondro (Indonesia) no seluk-seluk tan sira hatene liu moment-moment inportante kona-bá Timor. Husi sira ita aprende buat barak kona-bá ita nia historia rasik. Dala ruma ita hakfodak tamba ema estranjero sira koalia fali historia Timor nia mai ita. Maibé ita tenki recoinese ita nia kapasidade kona-bá ita nia historia rasik. Tamba kolonialista sira uluk nunka fó opurtunidade bá ema timor-oan atu aprende ita nia historia rasik. Agora historia Timor nia nakloken mai ita maibe ema nebe maka iha kapasidade maka bele asesu bá historia uluk nia tamba iha limitasaun bá problema liafuan (kendala bahasa).

Pasca Masacra Santa Cruz 12 Novembro 1991, Jill Jollife hamutuk ho komunidade internasional balu tuir Roahi Lusitania Express atu mai timor maibé estado Indonesia la fó licensa. Sira iha deit tasi klaran kari aifunan no fila-fali bá sira nia rai ho laran triste . Jill Jollife hetan antensaun makaas husi kontrola militer Indonesia la fó licensa atu tama Timor iha tempo naruk nian laran.

Jornalista estranjero halo kobertura kona-bá kondisaun Timor nian sempre fó implikasaun negatif bá politika Indonesia. Politiku nain sira Indonesia nia sempre kontra makaas bá kobertura jornalista estranjero. Katak ida ne’e lalos no latuir realidade. Maibé at liu tan maka jornalista sira nunka livre atu halo sira nia knaar nudar jornalista. Maibe tenki iha orientasaun husi militer Indonesia. Ita bele komprende no lalika imagina tamba tempo uluk tempo funu. Funu ida ne’bé maka uluk ita nia lider sira no cidadaun hotu-hotu ne’ebe maka hakarak ukun-rasik an, hakarak lalais no hakotu funu ida ne’e no lori ema asasinu sira bá tribunal. Maibé ohin loron ita liberta-an ita nia lider sira, iha ona politik foun ida no laperzija tan tribunal. Ita halo deit belun no lia los atu resolve problema umana iha tempo pasadu nian.

Masacra Santa Cruz 12 Novembro 1991 liu husi jornalista Max Thall nebe maka barani halo ninia kobertura hatudu bá mundo kona-bá asasinato militer Indonesia halo bá demonstrasaun iha Cemeteriu Santa Cruz, Dili . Politik Indonesia nafatin defende an katak militar Indonesia sira defende sira nia-an tamba demonstrasaun sira tiru uluk militer Indonesia. Kazu Santa Cruz nia nunka resolve ho diak no kriminozo sira tama kadeia bá deit soldadu sira laiha lideransa militer Indonesia ida maka responsalve bá kazu ida ne’e.

Komunidade Internasional liu husi kobertura Max Thall loke sira nia laran atu halo presaun makaas bá estado Indonesia. Ita nia lider sira iha rai liur mos servisu makaas liu tan no koalia iha forum Internasional atu resolve problema Timor nia iha momento ne’ebá. Jornalista Max Thall mos ladun hetan asesu diak bá media internasional sira iha estranjero, maibe Televisaun ida Japaun nia maka komunika makaas kona-ba kazu Santa Cruz iha momento neba wainhira Max Thall koalia tuir iha Audensia Publik CAVR kona-ba Masacra, Novembro 2003.

Ita bele dehan imprensa ninia papel bá kualker prosesu bá nasaun ida sempre iha memoria. Nasaun ne’e iha komplitu ka lae imprensa sempre halo sira nia knaar hodi tuir prosesu iha nasaun ida-ida. Ita labele nega papel imprensa nia bá historia Timor-Leste iha tempo pasadu, maisky imprensa ne’ebé servisu makaas bá problema Timor nia mai husi imprensa estranjero hotu.

Imprensa tempo komplitu no tempo dezemvolvimento knaar hanesan jornalismo lao nafatin. Maibe ita bele dehan tempo pasadu knaar imprensa sempre hetan amiasa husi militar no estado Indonesia. Iha tempo kolonial Portuges mos sempre iha kontrola husi governu Portugal hanesan senhor Jose Ramos Horta hakerek artigu ida kona-ba Mauberismo iha Seara nia hetan kastigu no desloka tia bá Mozambique .

Iha tempo Indonesia mos imprensa iha deit imprensa ida hanesan Suara Timor Timur (STT) agora muda naran bá STL (Suara Timor Lorosa’e) hari’i iha 1 Februari 1993 to’o agora halo ona 14 anos . Ita bele dehan funsaun jornalismo iha STT momento ne’eba hetan itimidasaun barak husi militer Indonesia no ukun-nain sira iha ukun Indonesia nia. Mesmo jornalista iha tempo Indonesia nia ukun hetan violasaun no itimidasaun barak, maibé sira nafatin hanesan knaar jornalismo avansa bá nafatin.

Historia jornalismo iha tempo pasadu hanesan referencia ida mai ita atu ita halo reflesaun ida bá historia imprensa nian iha tempo pasadu. Respeita no hadomi historia uluk nia maka ita bele fóti disizaun ruma kona-bá futuru imprensa nian bá ohin. Tamba historia Timor ita hakerek ho ita nia ran rasik. Liu-liu bá heroik no martir sira ne’ebé sai vitíma bá prosesu ukun-rasik an ida ne’e.

Imprensa iha Tempo Dezemvolvimento

Tempo dezemvolvimento imprensa Timor mos iha suseso maisky imprensa ida ne’e hari’i husi akudesa wainhira rai ida ne’e rahun husi militer Indonesia pasca refrendum 1999. Liberdade imprensa iha tempo transisi 1999 to’o agora ita bele dehan laiha sensor no laiha orgaun ida maka atu kontrala media hanesan tempo uluk. Komunidade imprensa mos la-persiza orgaun ida para atu kontrola editorial imprensa ida-ida. Freedom Hause orgaun independenti ida bá imprensa halo peskiza bá liberdade imprensa bá nasaun hotu-hotu iha tinan 2004, media Timor-Leste iha no 29 husi nasaun seluk-seluk ne’ebé maka koinese uluk kona¬-bá liberdade imprensa hanesan Italia, Philipina no Thailand . Peskiza ne’e fo indikator ida, katak liberdade imprensa iha Timor-Leste livre liu hanesan nasaun seluk ne’ebe sira fo sai iha leten.

Funsaun imprensa maka tenki luta bá demokrasia no luta bá liberdade bá espresaun, no mos tenki halo kontrola sosial iha nasaun laran. Liu-liu imprensa tenki hatene projectu saida deit maka governu halo bá nesecidade povo iha nasaun ida. Maibé media tenki tuir kode etik jornalismo nian, no mos media labele halo fali lutu bá nia-an rasik. Tenki iha balancu tuir kode etik jornalismo no lia los liu husi investigasaun no kobertura nebe maka livre no responsabilidade.

Tempo dezemvolvimento inportante liu maka knaar media nia labele hakutu ho lei governu nia nebe maka fó limitasaun bá liberdade bá espresaun wainhira halao knaar jornalismo nian. Hanesan hateten iha Biblia katak saida maka Kaisar nia tenki fó bá Kaisar no saida maka Maromak nia tenki fó bá Maromak. Iha tempo globalizasaun no teknologia ne’ebe maka abansado tebe-tebes no prosesu demokratizasaun orgaun ida-ida tenki sublina katak saida maka estado nia tenki fó estado no saida maka povo nia estado tenki fó bá povo hodi moris livre tuir regra no cultura rai ida ne’e nian. Hanesan direitu Sosial Politik no liberdade espresaun tenki fó bá povo hodi kontribui bá prosesu dezemvolvimento. Hodi nune’e responsabeliza bá prosesu hari’i nasaun nian laos deit bá governu nia leten maibe povo iha rai ida ne’e mos simu hotu responsabeliza bá prosesu hari’i bá nasaun.

Relasaun hanesan ne’e papel media inportante tebes hodi hato’o programa governu nia bá povo no guverno mos tenki suporta bá media hodi nune’e media bele sai hanesan guarda nasaun nian iha prosesu demokratizasaun nian laran. Hodi nune’e media laos inimigu bá governu maibe media hanesan paraseru diak ida bá governu hodi servi povo iha nasaun ida nian laran.


Helío Freitas, Servisu bá Asosiasaun Jornalista Timor-Leste.** Timor Post, 14 Marcu 2006

No comments: