Wednesday, March 15, 2006

Legaliza Kódigu Penál Dekretu-Lei Defamasaun

Husi : Helío Freitas

Esbosu kódigu penál dekretu-Lei kona-bá defamasaun atu legal ka lae “depende” bá Presidente RDTL. Podér Presidente RDTL tuir konstituisaun iha artigu 88 nia iha direito atu vetu. Presidente hare’e lei ne’e iha implikasaun ruma bá publiku. Presidente RDTL maka sei determina destinu Esbosu Kódigu Penál Dekretu-Lei Defamasaun hanesan krime. Maibé laos Presidente RDTL maka halo dekretu-lei no lei seluk-seluk tan.

Tuir statuta lei inan Konstituisaun maka boot liu, tuir mai maka lei no dekretu-lei. Esbosu dekretu-lei defamasaun produz husi konselho ministru laliu husi parlamento nasional. Dekretu-lei husi konselho ministru bá iha presidente, no presidente maka sei promulga atu vigor no implementa iha nasaun ne’e. Dekretu-lei defamasaun ne’e agora dadauk seiha gabineti Presidente RDTL.

Esbosu kódigu penál dekretu-lei defamasaun ne’e sei hamaten ema cidadaun tomak ninia idea atu kontribui bá prosesu dezemvolvimento no prosesu demokratisazaun iha nasaun ida-ne’e. Deklarasaun ida-ne’e husi konferénsia-imprensa ida husi Asosiasaun Jornalista Timor Lorosa’e (AJTL) hamutuk ho organisazaun seluk hanesan Sindikato Jornalista Timor Leste (SJTL), FTM (Forum Tau Matan), JSMP (Judicial System Monitoning Programme), TILPA (Asosiasaun Photograpí Timor Leste), TLMDC (Timor Leste Media Development Center), ARKTL (Asosiasaun Radio Komunidade Timor Leste), iha loron Tersa, 24 Janeiro 2006 iha sekretariado AJTL, Farol, Dili.

Governu liu husi Konselho Ministru iha tinan 2005 fó sai tia ona esbosu Kódigu Penál Dekretu-Lei Defamasaun ne’ebé maka iha artigu balun iha kódigu penál defamasaun laran preokupasaun bá jornalista no sosiedade sivil. Hanesan iha artigu 175-180 iha esbosu dekretu-lei kódigu penál defamasaun ne’e halo tauk ema hotu-hotu atu halo sira nia kritika no opiniaun bá iha públiku. Sosiedade Sivil no komunidade media halo diskusaun barak koba-bá kódigu penál depamasaun ne’e, no sira mos halo sira nia kritika makaas liu husi publikasaun social.

Iha artigu ne’e dehan katak jornalista ka cidadaun ruma hato’o sira nia reportase ka opiniaun bá públiku, kondena ema ruma nia tama kadeia tinan tolu (3) ‘atau’ multa tuir prosesu. Sugestaun ida maka la klaru iha esbosu dekretu-lei defamasaun ne’e ema cidadaun ka jornalista ne’ebé maka halo defamasaun ema ida maka tama kadeia ka, ema ne’ebé maka hari’i imprensa. Ida-ne’e sidauk klaru iha esbosu dekretu-lei defamasaun ne’e. Pergunta boot ida maka sei rai hela iha komunidade media iha Timor Leste ninia rentos.
Esbosu kódigu penál dekretu-lei defamasaun ne’e maka legal duni iha nasaun ida-ne’e tuir hau nia hanoin ne’e hanesan ameasa boot ida bá ema cidadaun hotu-hotu atu hato’o sira nia opiniaun no kritika bá ema ne’ebé tuir iha funsaun públiku. Lei defamasaun ida-ne’e mos viola fali lei inan iha Konstituisaun RDTL ne’ebé maka fó garante bá liberdade imprensa iha artigu 40-41.

Sasan diak ida maka husi esbosu dekretu-lei defamasaun ne’e hanorin ita atu ita sukat ita nia nanal wain hira ita hato’o opiniaun ka kritika bá públiku tengki responsabiliza bazeia bá dadus no factu ne’ebé maka los no lia-los.

Pe. Martinho G. Da Sílva Gusmão koalia iha workshop ida-ne’ebé organiza husi AJTL (Asosiasaun Jornalista Timor Lorosa’e) iha loron 21 Dezembro 2005 iha Hotel Turismo, Dilí nia dehan katak Igreja hanesan organisasaun “sensor tertua” iha mundo ne’ebé maka uza lei defamasaun husi ukun Amo Papa Lucio iha tihan 1184 to iha Konsili Vaticano II. Maibé Igreja komesa usik ona lei defamasaun ne’e. Governu Timor Leste maka uza fali lei defamasaun ne’e entaun Igreja mos kontenti tamba sarani sira tauk atu koalia lian at bá malu.

Governu Timor Leste mos fó garante Lei Defamasaun ne’e hanesan dalan ida atu hanorin ema liu-liu jornalista sira atu profesionál liu tan iha area komunikasaun sosial, temi husi Dr. Antonino Bianco, koalia hamutuk ho Pe. Martinho Gusmão fó sai iha leten.

Tuir hau nia hanoin atu profesionál ka la profesionál jornalista Timor oan iha bontade diak no nafatin kontribui prosesu hari’i nasaun komesa husi akudesa ne’ebé maka halo rahun husi pasca refrendum tihan 1999 to’o ohin loron. Pe. Martinho Gusmão iha worskhop ne’e koalia liu tan katak; governu mos iha vontate diak atu subsidi bá media sira para media sira sai forti liu tan, sa’e tan amenta fali sasan todan liu iha jornalista sira nia kabaas.

Lia-Los

Liberdade imprensa bá demokrasia iha Timor Leste tama kategoria diak iha mundo tuir organisasun independenti balun ninia peskiza iha tinan 2005 nia laran. Imprensa Timor Leste iha nasaun Italia no nasaun seluk nia leten bá liberdade imprensa bá prosesu demokratizasaun. Valor ida-ne’e fó esperitu luan bá komunidade media atu servisu makaas liu tan no mos atu involve a’n iha prosesu dezemvolvimento maiske iha kapasidade limitadu.

Maibé ita (timor oan hotu) presentase hira maka loron-loron aksesu bá media. Factu ida-ne’e cidadaun lubun ida maka lakon oportunidade atu hetan informasaun liu husi komunikasaun sosial. Oin sa ita bele hatene lia-los iha komunikasaun sosial loron-loron nia iha media massa. Liu-liu saida maka governu halo bá prosesu dezemvolvimento iha rai ida-ne’e. Ne’e reflesaun boot ida mai ita hotu, atu ita hanoin iha bá prosesu hari’i nasaun Timor Leste bá oin.

Parti seluk jornalista sira halo kobertura ruma kona-bá seminario no debates ruma sira dala-ruma bá tarde, fila mos sedu liu. Sira la adapta prosesu topiku husi premeiro to’o remata. Sira iha klaran deit, quando la halo konfirmasaun.

Ita nia lider ka polítiku sira mos halo kritika no hasa’i sira nia opiniaun mos bazeia bá publikasaun media massa nian. Hatutan bá lia-los quando polítiku sira la halo konfirmasaun sira bele ‘salah kaprah’. Ita bele dehan jornalista mos ‘salah kaprah’ no polítiku nain sira mos ‘salah kaprah’ hotu. Publiku ne’ebé loron-loron asesu bá publikasaun sosial mos “salah kaprah” hotu koba lia los.

Bazeia bá publikasaun sira hanesan ne’e, polítiku nain sira la-tahan sira nia an bele mos tama rai kuak, wain hira esbosu kódigu penál dekretu-lei defamasaun ne’e legal duni iha Timor Leste. Tamba korbetura jornalista sira iha media massa laos absolutu no konkreta hanesan koalia iha leten.
Esbosu kódigu penál dekretu-lei defamasaun ne’e mos bele dehan kontradiksaun uituan atu implementa iha nasaun ida-ne’e. Tinan hirak liu hafoin ukun-rasik an, Nasaun RDTL hahu ratifika lei internasional lubuk ida hodi implementa iha nasaun ne’e. Hanesan Konvensaun kona-bá Direitu Sivil no Polítiku iha artigu 19. Nasaun barak maka komesa hasai ‘kamiza’ lei defamasaun ne’e hanesan krime. Maibé Governu Timor Leste adopta fali lei ida-ne’e hodi defende sira nia reputasaun. Ita fila bá kotuk ema la’o bá oin.
Esbosu kódigu penál dekretu-lei defamasaun ne’e mos bele dehan katak aban-bainrua bele kesi fila-fali ema ne’ebé maka agora tur iha Governu, wain hira sira nia tempo tama ona iha idade reformado. Sira mos dala-ruma sai vitíma bá fali lei defamasaun ne’e. Quando sira hatun ema nia dignidade no halo defamasaun bá cidadaun seluk no ema ne’ebé maka tur iha Governu tuir mai. Ne’e dehan katak ‘senjata makan tuan’. Maibé at liu tan maka lei ida ne’e mos sei proteza ukun nain sira wain hira sira laiha podér alias reformado. Ita bele dehan katak ne’e artigu-artigu tempo Suharto maka uza. Nia lenser tia ona mos ema ida nunka hatama nia bá prizaun, wain hira iha akuzasaun barak-barak bá nia hanesan korupsaun, viola direitu umanus no seluk-seluk tan. Tuir lolos ukun nain sira merese hetan kritika husi cidadaun wain hira sira hala’o sira nia funsaun publiku.

Bazeia bá ideia hirak ne’e maka ita tengki halo reflesaun wain hira lei ida hanesan ne’e atu implementa iha nasun kiik ida-ne’e. Hatama ema ida bá kadeia tan deit defamasaun ita hotu-hotu ‘lakon’. Governu lakon tamba Governu tengki amenta kapasitasaun recurso umanu no orsamento atu halo prizaun, no seluk-seluk tan. Ema cidadaun ne’ebé halo defamasaun bá ema mos lakon ninia opurtinidade atu moris livre no lakon mos opurtunidade atu halo kontribui liu husi ninia hanoin no opiniaun bá públiku. Tamba nia tauk atu halo kritika liu husi publikasaun.

Defamasaun ne’e maka legal duni iha Timor Leste, governu mos tengki amenta recursu umanu husi parti juis no procurador atu resolve kazu ne’ebé maka sei mosu mai tamba defamasaun. Tuir informasaun katak iha 3000 resin kazu maka juiz sira sidauk resolve no sei iha tribunal. Tamba juis no procurador iha kapasisidade limitadu atu resolve problema hirak ne’e.

Ne’e duni esbosu kódigu penál dekretu-lei defamasaun ka lei seluk-seluk tan ne’ebé maka sei tuir mai tengki sukat kapasidade governu nian no mos bele responde cidadaun ninia hanoin no opiniaun hodi kontribui bá prosesu dezemvolvimento iha era demokratizasaun no globalizasaun.***

Helio Freitas, servisu bá Asosiasaun Jornalista Timor Lorosa’e (AJTL), Timor Post, 3 Feveruari 2006

No comments: